海洋公園招銀髮大使 老友記推廣海洋保育

海洋公園向來都好積極推廣環保同動物保育，黛安仲知道，原來海洋公園2016年開始已經推行「海洋公園x信和集團黃金導賞員計劃」，等一班退休嘅老友記可以做義工打發時間，同時可提升佢哋嘅環保意識！

聽公關姊妹講，喺18/19年度參加者有74個，年齡由45歲至73歲都有，參與人數創咗歷年新高，佢哋喺舊年9月到今年6月喺園內做保育教育大使，向大眾推廣保育信息。有老友記同黛安分享，做咗義工後成個人都開朗咗，仲透過活動識咗一班朋友，學多咗唔少關於海洋生物嘅知識，好多人聽完佢哋講解，都讚佢哋講解得夠仔細。

姊妹仲話，海洋公園做咗一個調查，了解呢個計劃嘅成效，發現呢班義工嘅環保意識比一般人高。佢哋喺網上訪問咗74個黃金導賞員，同埋108位45歲或以上嘅公眾人士，結果發現9成導賞員已經無再食魚翅，比公眾組別高31%，仲有87%義工表示有走飲管嘅習慣，仲話會向其他人推介環保海鮮、減少淋浴時間等。

今次年紀最大嘅黃金導賞員係73歲嘅Stephen，佢話以往得閒就去公園睇人捉棋，成日都瞓覺，搞到孫仔成日笑佢係「睡佛」，自從做咗黃金導賞員之後，覺得生活變得好充實，環保意識亦提升咗，除咗減少用即棄產品，外出食飯都唔會浪費。

海洋公園行政總裁李繩宗同黛安講，遊客對黃金導賞員嘅評價都好正面，希望之後可以招募更多退休人士參與呢個咁有意義嘅計劃。報名可瀏覽https://www.goldenage.foundation/golden-age-docent-2019。