昨晚(22日)有消息指，鄧健泓(Patrick)嘅老婆石詠莉(Sukie)喺浸浴期間，突然出現休克現象，Patrick喺接受公開訪問時，講返成件事嘅經過：「佢浸咗20分鐘就大叫『老公我唔掂喇』，我就即刻衝入去，立即抱起佢，但當我將佢抱喺身邊時，佢已經冇咗知覺，兩隻眼已經反白，係去到一個休克狀態。而最恐怖嘅就係佢對手同腳都係黑晒...」
(石詠莉ig@sukieshek)
兩人吵架過於激動 導致身體出現奇怪狀況？
Patrick見到Sukie嘅情況咁嚴重，佢不得不送Sukie去醫院。當Patrick正想搵電話準備報警時，Sukie嘅情況變得更加嚴重：「佢係抽筋抽到(隻手)好似鳳爪咁，唔郁得。隻腳係冇知覺，又瘀黑晒。」當醫護人員到場時，佢第一句就問：「你哋有冇嗌交啊？」令Patrick感到一頭霧水。後來經醫護人員了解後，就知道Sukie原來係患上一種叫「過度換氣綜合症」。Patrick表示，有呢個綜合症嘅原因，係當一個人激動時就會產生呢個問題。當時Sukie喺浸浴時瞓咗覺，當佢開始覺得抖唔到氣時，身體就會不停咁狂吸氣，就係因為佢吸入太多氧氣，以致呢個綜合症嘅出現。
(石詠莉ig@sukieshek)
(石詠莉ig@sukieshek)
夫妻一直互相扶持 鄧健泓曾幫佢搵返「靈魂」
Patrick老婆Sukie曾係性感組合Freeze嘅成員，被謔稱「整容三嬌」之一，由於公司嘅安排，佢哋一直都走性感路線。直至後來Sukie離隊後獨立發展，遇見「真命天子」Patrick, 搖身變為暢銷歌姬。Patrick同Sukie喺2013年開始拍拖，Sukie嘅第一隻碟《聽聽Sukie'S》都係由Patrick自資幫佢出，結果呢隻碟成績幾唔錯，仲喺「IFPI香港唱片銷量大獎2016」被獲頒「十大銷量廣東唱片」及「IFPI十大銷量本地歌手」獎項。Sukie曾喺公開訪問表示，Patrick幫佢喺事業上搵返自己個『靈魂』：「好開心識到佢，佢教識我做歌手原來係可以揀自己鍾意嘅音樂，我依家真係知道自己做緊咩喇我終於。」拎完獎冇耐，Patrick就向Sukie求婚，兩人喺2017年12月正式拉埋天窗, 結束5年愛情長跑。
曾經都是熱門歌手嘅鄧健泓, 雖然依家冇做幕前, 但他就退一步擔任幕後工作，捧老婆上位, 結果老婆嘅事業有起色後, 鄧健泓就被反指佢係「軟飯王」，靠老婆搵錢養家。但鄧健泓一啲都唔介意, 仲話自己已經去到某個位置，已經冇其他可能嘅事會發生喺佢身上，佢寧願投資喺老婆身上, 讓更多可能性發生。
(石詠莉曾是本地女子組合Freeze成員之一@TVB《美女廚房》截圖)
(石詠莉曾是本地女子組合Freeze成員之一@東星娛樂)
(石詠莉為新碟進行錄音工作＠石詠莉ig : sukieshek)