【聲明】港生活網站並無進行電話推廣活動

樂善堂辦首屆創科大賽 創意發明助弱勢社群

發佈時間: 2019/07/25

近年學界積極推行STEM教育,黛安噚日就出席咗九龍樂善堂主辦嘅「第一屆關懷弱勢社群—全港創新科技大賽」,中、小學參賽隊伍有超過100隊,只有15隊入圍,競爭咁激烈,認真唔可以睇少佢哋!

今次嘅比賽主題係「關懷弱勢社群」,推動創新科技教育之餘,仲傳遞關懷身邊有需要人士嘅信息;同日仲舉辦咗頒獎禮,黛安覺得同學仔個個唔單止有創意,仲好關心社會!樂善堂楊仲明學校就以「順手牽杖‧智能手杖」贏得小學組冠軍,智能手杖可以自動亮起LED燈照明,如果長者跌親或者使用緊急掣,就會發出求救訊號引起途人注意,仲可以話畀屋企人知長者返到屋企,非常實用。

黛安聽隊員曾作坡分享話,佢哋當初係上網睇資料,見到好多關於老友記嘅意外新聞,所以諗到呢個設計,仲特登去老人院收集意見,改良咗3次後,終於解決咗光感度不足嘅問題,成功以低成本接近300元研製出智能手杖。

另外,何明華會督銀禧中學就以「鄰‧倚」奪得中學組冠軍,參賽學生柯卓彥話,因為睇電視見到輪椅人士落斜坡要倒後落,唔方便之餘又危險,令佢哋萌生設計配件幫輪椅人士,用咗4個月時間設計和研製,部分配件亦都用3D打印技術製作。

出席頒獎禮嘅教育局局長楊潤雄話,希望透過比賽幫到長者、失明和行動不便嘅人士,改善生活質素,培養學生正面價值觀。

何明華會督銀禧中學參賽同學透過編程計算出地面斜度,再自動調整前輪高度。

撰文: 黛安 消息特靈八卦公關
欄名: 八卦名利場