前女子組合Face to Face成員吳少芳（Jodi）1992年不幸遇上嚴重車禍，導致四肢癱瘓，從此就過著輪椅代步的生活，由大受歡迎的女子組合，突然變成幾乎不能自理的殘障人士，天堂跌落谷底，但Jodi未有放棄自己的生命，反而一步一步繼續在生活上進步，由最基本的呼吸都不會，至今利用電腦可以跟外界溝通，甚至在社交平台上分享感受，以正能量去影響大家。直至日前，Jodi獲鄭秀文（Sammi）的邀請，踏上紅館的舞台擔任嘉賓，兩人在台上合唱時激動落淚，感動現場所有觀眾之外，短片在網上發放後，令大家都非常感動。
一click即睇：
Jodi雖然曾經面對人生低潮，但她仍然掛上甜美的笑容，勇於繼續向前走。（《晴報》圖片）
相關新聞：Face to Face吳少芳癱而不廢 教新人研製辣椒油做慈善
受梅艷芳影響入行
Jodi自小幻想長大之後要做空姐、老師或者全職運動員，不過統統都沒有發生，反而當上歌手，她表示：「我細個時冇特別鍾意唱歌，但我鍾意跳舞，經常會參加跳舞班，直至到梅艷芳嘅出現，佢一出道我就好鍾意佢，拎住把牛角梳當係咪，周圍唱歌學佢，後來唔知點嚟嘅勇氣就參加1988年新秀歌曲比賽，咁就入行喇！」Jodi感激父母給她的自由度，讓她在興趣上發展，她個人參與第7屆新秀，後來在歌唱比賽中認識到Connie，兩人一齊再參加第8屆新秀，不過試完音之後沒有入圍，反而當年的著名經理人李進跟她們簽約，並以Face to Face組合正式加入樂壇。Face to Face出道後，造型非常獨特有型，推出《一些》、《情迷Milano》等等歌曲都大受歡迎，Jodi形容一切都非常順利：「我入行之後第一次有機會見到梅艷芳，當時佢拍緊戲，經理人帶我哋去介紹，我感覺自己好似成個傻仔咁呆咗，佢好好咁同我哋打招呼，之後有次機會可以同佢食一餐飯，真係好開心，當時佢同男朋友一齊, 平日好強硬外表都變成小鳥依人，所以我亦有同梅姐有一千零一張合照，好珍貴。」
Jodi組成Face to Face絕對跟梅艷芳有直接關係。（圖片：《FACE to Face一些從前現在》）
與Connie友情不變
娛樂圈做組合不容易，Jodi表示幸好她跟Connie是入行前已經是朋友，她說：「當年我哋參加英文歌比賽，成班參賽者都變成好朋友，所以我同Connie先89年一齊參加新秀，我哋個性好夾，連著衫的喜好都好似，不過我就比較男仔頭，好習慣會照顧身邊嘅女仔朋友。我成日覺得自己好好彩，入行過程之中有人陪住，我哋之間冇嘢要爭，冇分邊個係主角、邊個係配角。」入行之後平步青雲，公司安排好多工作，音樂團隊為她們創作一首又一首好歌，讓她們得到不少獎項，Jodi形容當時跟Connie一邊工作一邊玩，不時跟前輩四出登台，對她而言是很開心的經歷。
Jodi慶幸自己跟Connie多年來合作都沒有分歧。（圖片：《FACE to Face一些從前現在》）
當年組合的造型非常獨特，在樂壇獨當一面。（圖片：《FACE to Face一些從前現在》）
「慶幸我從來冇想死嘅感覺」
1992年遇上嚴重車禍後，Jodi由於頸椎傷得太重，導致四肢癱瘓，入住深切治療部5個月重新學呼吸，後來再住5個月普通病房及8個月復康院，出院後正式開始人生另一段路。她說：「你問我係咪會好難過呢？當然一定有難過嘅時候，但我慶幸自己從冇諗過死。ICU嘅時候，家姐喊到豬頭咁，問我：『阿芳，使唔使幫你掹喉？』嘩，好大件事，我插住呼吸機講唔到嘢，但我瞪大對眼做口型話唔好，好彩我話唔好，否則害死我家姐。其實我好大領悟，原來只要你唔放棄，家姐知道我唔想死，咁佢就去幫我，不停去搵名醫同宗教人士，原來當睇見一個垂死嘅人都唔放棄，就已經係幫佢打咗氣，佢可以去幫返我。」Jodi感恩家人都好硬朗和正面，妹妹一直負責照顧她的起居飲食，Jodi每逢提到妹妹都忍不住落淚，她說：「妹妹照顧得我好好，我住院整個旅程，佢由中午12點到夜晚12點都陪住我，直至鎖門為止，我覺得身邊好多天使，我好幸運，有個咁好嘅家庭。六兄弟姊妹感情好好，爸爸搵食湊大我哋幾咁辛苦，見到爸爸媽媽都好努力做人，我哋都冇咁容易放棄。」
Jodi感激家人的支持和照顧，令她生命入面被天使包圍住。（圖片：《FACE to Face一些從前現在》）
Jodi直言家姐曾經考慮過在她住院期間為她拔喉。（《晴報》圖片）
鄭秀文是天后也是天使
Jodi早前為「恩光成長中心」寫歌籌款，但礙於自己不是基督徒，於是膽粗粗邀請Sammi獻聲，沒想到對方一口答應。在拍攝MV當日，Jodi眼前是悉心打扮的Sammi，她穿上高跟鞋仍願意蹲在她的輪椅前跟她聊天，Jodi萬分感激，即時激動得流下眼淚。直至今次演唱會，Sammi邀請她擔任嘉賓，雖然她擔心自己唱得不好，但Sammi認為意義重大，Jodi說：「Sammi知我鍾意唱歌，今次邀請佢當作係一份禮物咁送畀我，紅館係好多人夢想嘅舞台，我好快就答應，當晚合唱時，我見到佢嘅眼淚，佢真係好真心，好有愛心，好多謝佢，我知我唱得唔好，但感激佢嘅歌迷冇嘘我！」
Jodi日前擔任鄭秀文演唱會嘉賓。（圖片：大會提供）
{{hket:inline-image name="527A8508_s.jpg"}}{{/hket:inline-image}}
Jodi跟Sammi雙雙激動落淚，感動全場觀眾。（圖片：大會提供）
難關會過去 珍惜生命
縱使四肢癱瘓，Jodi仍能仰頭大笑，有甚麼事比這樣更加重要呢？在車禍中走過死亡的幽谷，在低潮中重拾生命的力量，Jodi四肢沒有活動的能力，但愛在她的身邊從不缺乏，看似失去卻獲得很多，看似困難但意外地做到了。Jodi說：「其實每個人都應該好好珍惜自己生命，命只得一條，我明白面對挫折、病痛或失去，一定會好難受，但總會過去的。曾經我踩到海膽，痛到黐線，如今望同一個受傷位置，才記起原來我踩過海膽，但痛已經過去。今日嘅失去，難保聽日會回來，仲會比原本嘅更加荀呢？唔好因為一時損失就放棄，未試過唔知自己得，就算四肢癱瘓，我仲有個腦，仲有好多嘢可以做到，之前成家人去紐西蘭旅行，行程我一個人安排好，訂機票、車、酒店等等，我都做得到，其實有咩會做唔到？大把人有手有腳有頭腦，就算有事發生，一定會過去，唔好放棄，加油！」Jodi近來為了家人的健康著想，特別研製獨家辣椒油，連Sammi都讚口不絕，在有限的能力之內，創造無限的不可能，這就是屬於Jodi的人生意義。
Jodi認為人生充滿未知之數，不應該為一時的困難就放棄。（《晴報》圖片）
Jodi製作的辣椒油大受讚賞和歡迎，成為她每日研發新口味的動力。（《晴報》圖片）
部分相片來源：《FACE to Face一些從前現在》文本+精選集