前BOY'Z成員張致恒(Steven)昨日（25/7）突然喺個人ig爆出婚訊，同女粉絲雯雯即將拉埋天窗，仲已同未婚妻育有一個3個幾月大嘅仔仔，令大家都感到非常意外。由於Steven本來有位公認嘅正印女友梁皓恩(April)，點知佢竟然一瞬間被降級變前度，令April大受打擊。當大家都以為呢件只係一段三角戀關係嘅事時，又再爆出有第四、第五、第六者出嚟，齊齊向Steven問責。
張致恒(Steven)過往情史複雜，佢同歷屆咁多位前度分手，都離不開「偷食」呢個原因。Steven其中一次被踢爆同莊端兒拍拖期間，暗交圈外台妹Doris時，佢解釋自己係因為患咗性上癮所致，需要接受醫生治療，但後來Steven同梁皓恩嘅感情曝光後，佢又澄清話自己係冇患「性上癮」:「當日記者問時我太心急亂講，想將責任賴落個病度，其實我冇呢個病。」
(張致恒ig@stevencheung)
(張致恒ig@stevencheung)
瞬間被降級變前度 — 梁皓恩
Steven同April呢段戀情喺17年曝光，Steven喺個人社交平台大曬合照放閃，佢公開戀情嘅原因係佢認為自己過去「個底」太花，所以想畀安全感對方，仲話已認定April係結婚對象。不過，喺19年6月底，Steven就畀人影到佢喺深圳羅湖萬象城同一個長髮少女公然攬頭攬頸。而該位拍片人形容，嗰位長髮少女目測係20幾歲，身材偏圓潤有肉地。少女對Steven非常主動，佢從後熊抱完Steven後，就用雙手緊緊繞着Steven行，相當痴纏。當Steven發現咗有人影緊佢哋後，就表現有所避忌地轉身離開。事後，有傳媒以短訊向Steven詢問有關佢同April嘅感情狀況時，佢並冇作出回應。直至琴日，佢又突然爆出即將同女粉絲雯雯結婚，仲同未婚妻生埋仔，搞埋百日宴。
(梁晧恩ig@dayofapril)
(張致恒ig@stevencheung)
其實今次不是單一事件，Steven在圈中的情史非常之多，不過他曾經多次牽涉有第三者，導致感情出現問題，傷害不少前度。
傅珮嘉
Steven喺04年同大佢3年嘅歌手傅珮嘉發展姐弟戀，戀情只維持咗3年，就因被爆出佢偷食網友Fiona及情慾對話而結束感情，後來佢公開表示：「我最對唔住傅珮嘉。」
(傅珮嘉ig@fufuamulet)
鍾舒漫
Steven同鍾舒漫(Sherman)喺08年被爆出兩人喺某公屋同居，但兩人一直冇公開承認關係，後來有傳Steven係因為偷食嫩模孫旗而導致同Sherman 3年情玩完。孫旗當時仲自爆張致恒奪走佢初夜後玩消失，Steven事後自認衰鹹濕玩一夜情。
(鍾舒漫ig@chungshersher)
莊端兒
繼孫旗之後，Steven就同身材玲瓏浮凸嘅35E莊端兒撻著，兩人拍拖兩年多，就被傳分手。據指分手原因係Steven趁莊端兒外遊時，搭上有錢台妹Doris，仲畀人影到佢去其香閏「探訪」，令莊端兒決心斬斷情絲，結束兩年情。Steven事後公開表示自己患咗「性上癮」，所以自己控制唔到, 並需要接受治療等。不過後來Steven又話自己當時只係太心急先亂講, 並非真係「性上癮」。
(莊端兒ig@xeniachong)