無綫電視城外牆昨晚突然冚上一幅大型黑帆布,揭開帆布後驚見有人用黑色噴油在牆上寫大字報「TVB黃庭鋒欠債還錢」嘅字句,令現年30歲嘅無綫藝人黃庭鋒捲入欠債疑雲。
▼黃庭鋒(東星娛樂)
▼黃庭鋒凌晨急於社交網及聲明澄清自己冇債務問題,仲話自己已經就呢件事報警。(黃庭鋒Instagram )
▼唔少粉絲都留言力撐!(黃庭鋒Instagram )
黃庭鋒最為人所熟悉莫過於舊年喺台慶奪得過百萬獎金同獎品,之後喺劇集《救妻同學會》飾演「賤佬」嶄露頭角。
▲台慶揮低汪阿姐贏百萬巨獎。(黃庭鋒Facebook)
▲黃庭鋒(左)於《救妻同學會》中飾演「賤佬」。(黃庭鋒Instagram)
黃庭鋒可以話係十項全能,佢曾到日本留學,能操日文、英文、廣東話與普通話四種語言,而且仲係運動天才,有「港版足球小將」之稱。中學時黃庭鋒就讀英國的Old Swinford Hospital,該校學生除了學術成績優異,仲聘請前職業足球員Dale Rudge作為教練,培訓學生足球技巧,所以黃庭鋒讀書時體育成績已非常標青。
▲黃庭鋒食正無綫近年愛用運動健將嘅勢。(黃庭鋒Facebook)
去到高中時期,黃庭鋒更係學校足球隊唯一一位亞洲球員,仲去過阿根廷同智利踢校際賽,奪得MVP(最有價值球員)獎。佢原本有機會去阿士東維拉與狼隊青年軍試腳,有機會成為職業球員,但因撞正考試而被逼放棄。
▲黃庭鋒(黃庭鋒Instagram)
黃庭鋒後來決定回港半工讀中文大學體育系碩士,一邊讀書一邊做體育老師,之後又加入無綫轉行做演員,黃庭鋒更要賺錢養家:「有時工作會同讀書撞時間,而且最後課程比較難,半工讀壓力好大,連拍攝嘅時候都要睇住溫習筆記,多次想過放棄,最後要延期讀咗兩年半先完成。最愛爸媽默默支持,從來唔會比壓力,佢地會用任何方法鼓勵我!」
▲黃庭鋒與母親(黃庭鋒Instagram)
▲幾經辛苦都終於喺舊年11月畢業。
希望今次嘅「欠債風波」唔會影響到佢嘅星途啦!