【聲明】港生活網站並無進行電話推廣活動

登記八達通坐巴士儲分兼抽獎 贏價值百萬「九巴月票」

發佈時間: 2019/08/14

公共交通工具可以話係每個打工仔嘅好朋友,但有無諗過可以一邊搭車一邊參加抽獎呢?黛安聽公關姊妹講,九巴最近推出咗一個總值過百萬蚊嘅「九巴月票」大抽獎,凡年滿18歲嘅乘客,只要喺聽日起嘅一個月內,使用經登記嘅八達通卡搭九巴,就可以參加喇;搭得愈多,抽中機會愈大㗎!

黛安身邊都好多朋友仔每日要搭九巴返工,聽講今次大抽獎由聽日起(15號)至9月14號期間舉行,參加方法仲好簡單,只要年滿18歲,透過九巴流動應用程式App1933登記八達通卡,然後再用佢嚟搭九巴路綫,或者多條由九巴經營嘅聯營綫都得;而且每搭1次,就可以獲得1分嘅優惠積分,累積滿10分就可以獲得1次抽獎機會喇,如果儲滿20分就有2次抽獎機會,餘此類推,每張八達通卡可以喺推廣期內獲得1次中獎機會!

此外,九巴仲會以電腦系統隨機抽出得獎嘅八達通卡號碼,每位得獎者將獲得九巴月票八達通卡連九巴月票乙張,價值港幣1,030蚊,名額有1,000個。抽獎結果就會喺今年10月2號或之前公布,如果得獎者喺11月15號前仍未能領獎,就當作棄權論。

但要記住,今次活動不適用於小童八達通卡、任何免費乘車證,或者推廣期內任何一日列明當日有效嘅九巴月票八達通卡。黛安提提大家,搭得多中獎機會愈大,聽日一於開始密密搭九巴喇!

撰文: 黛安 消息特靈八卦公關
欄名: 八卦名利場