港兩小學奪金獎 揚威世界機關王大賽

黛安聽講香港青年協會「LEAD創意科藝工程計劃」主辦嘅「香港機關王競賽」，最近就派咗12個優勝隊伍，代表香港參加喺台中進行嘅「世界機關王大賽」，同250支來自世界各地嘅隊伍比賽。其中，首次參賽嘅港澳信義會小學喺《GM Jr.積木創客盃》表現突出，喺兩個即場指定任務擊敗所有對手，獲最高分數攞到金獎；而福榮街官立小學就用積木零件同環保材料，喺《GreenMech機關整合賽》嘅高小組首次勇奪世界冠軍。

香港青年協會青年創業總監李健樂亦恭賀所有得獎隊伍同參賽者，仲寄語佢哋持續激發對學習科學同創意嘅興趣。