被指冷落老婆囡囡 張家輝︰佢哋已經慣咗

張家輝與任賢齊（小齊）前晚出席電影《沉默的證人》首映禮，二人向來是圈中廿四孝爸爸及老公，不過近日有報道指家輝工作太忙，冷落了太太關詠荷及女兒，家輝特意澄清一家人關係依然融洽。

張家輝、任賢齊及陳家樂等前晚出席首映禮，家輝在片中飾演法醫與犯罪頭目小齊有多場打鬥戲，小齊直認打得相當辛苦︰「好彩我同家輝有默契，雖然拳腳無眼，但起碼節奏同動作都配合到。家輝好體貼，拎起滅火器、玻璃樽都會用個頭嚟試下先，佢覺得ok先拎嚟打我。」小齊拍攝時更不慎受傷︰「斷咗肌肉筋腱，用咗個幾月拐杖，大家都好就我，拍咗文戲先。」

擔心沙漠無廁所

近日有報道指家輝因忙於工作，冷落了太太關詠荷和女兒Brittany，家輝聞言笑說︰「不如搵一次我同個女行街，佢（太太）去做嘢，其實佢哋兩個已經慣咗！（最近很少享受家庭樂？）都唔係，例如我做嘢一段長時間，我返嚟都會同佢哋出去食餐飯。」不過他坦言今年暑假因忙於拍戲，實在無法陪女兒去旅行，只好由太太與女兒去外地，對此他亦感到遺憾︰「屋企人慣咗我好少喺屋企，所以都無不滿。」

小齊聞言，表示自己同樣工作忙，惟有公餘時間盡量陪伴家人。家輝指小齊常有戶外活動，有時間也想一起參與。小齊說︰「我拍紀錄片去咗好多地方，我可以帶家輝去沙漠。」家輝問︰「沙漠有無廁所㗎？如果我喺度瞓，咁啱有人去完廁所，我瞓瞓下一手插咗落去，有件年糕喺度？哈哈！」另外，家輝日前欣賞容祖兒演唱會，但沒上台獻唱，他說︰「我無時間練歌，你估真係行出嚟，唱歌就唱歌咩！」

撰文︰Pauline

編輯︰李潔盈

美術︰招潤洪