黛安
黛安

首個「大嘥鬼客廳」登陸沙田 在「家」學習環保知識

發佈時間: 2019/08/22

首個「大嘥鬼客廳」登陸沙田 在「家」學習環保知識

愈來愈多人都開始注重環保,黛安聽聞,由基督教家庭服務中心營辦嘅「綠在沙田」,最近將佢哋嘅教育廣場打造成為首個融合教育與回收重用嘅「大嘥鬼客廳」,希望以大眾吉祥物大嘥鬼作為切入點,以趣味性手法教導市民建立「唔好嘥」嘅良好習慣,呢個「客廳」即日起對外開放喇,大家有時間可以去睇下!

黛安知道,呢個「大嘥鬼客廳」入面隨處可見多種大嘥鬼裝飾同環保信息,當中包括將早前回收嘅廢棄物料,好似木材、布料同玻璃樽等,製作成唔同嘅環保家具;飯枱同椅子就擺放環保墊枱布同餐具;書櫃又用嚟展示唔少回收嘅書籍。

為咗「塑造」家庭嘅感覺,客廳內仲有個專門播放大嘥鬼宣傳片嘅電視櫃;仲有放置大嘥鬼衣服、手袋、帽同鞋嘅晾衣架同衣架;茶几同梳化亦有唔少大嘥鬼圖像茶具同公仔,非常真實㗎。

此外,主辦方「綠在沙田」噚日仲專誠安排咗一大班小朋友同環境局局長黃錦星、大嘥鬼一齊試玩,大家一邊影相打卡,一邊感受環保家庭嘅氛圍,從中學習正確嘅環保知識,真係好玩又有意義。

呢個客廳即日起至下個月22日會免費開放,每日下午3點至4點,仲有導賞團同製作大嘥鬼公仔嘅工作坊,兼有「大嘥鬼巨型康樂棋」、圖書共讀、玩具復修、紙迷宮等多項活動,適合大人細路齊齊玩住學嘢!咁吸引,大家記住唔好錯過喇!

撰文: 黛安 消息特靈八卦公關
欄名: 八卦名利場