以歌手身份上電視 余香凝唔識用耳機

余香凝前晚首度以歌手身份，亮相無綫節目《流行經典50年》，她更在節目中獨唱一曲。她笑言心情太緊張，連歌手耳機都不懂得使用，要向同場的馬浚偉請教。

余香凝、馬浚偉、呂良偉及陳松伶等前晚擔任表演嘉賓，她笑言本來只與馬浚偉（馬仔）合唱《只怕不再遇上》，後來對方提議她多唱一首，所以她選擇獨唱《如風》。她笑說︰「多謝馬仔提攜，搵我做佢演唱會嘉賓，令我受寵若驚。」

余香凝自言雖然曾出個人單曲，但因唱live經驗少，連歌手耳機也不懂得用︰「唔知戴晒全隻定戴一半好，要請教馬仔會安心啲，其實同佢合唱嗰陣係放鬆嘅，獨唱就比較緊張。」她又笑說︰「同事話我成日瞇埋眼同皺眉，我顧得唱歌，又未必顧到台風，遲啲我去睇容祖兒演唱會，會參考人哋嘅台風，頭先錄影我都幻想自己係個好勁嘅歌手。」

呂良偉考慮返港拍劇

同場的呂良偉已久未在熒幕前獻唱，他笑說︰「因為修哥（主持胡楓）叫到，佢係我好尊重嘅前輩。」問他會否考慮回港拍劇集？他表示︰「無綫無搵我呀，同埋我喺內地有好多工作，唔能夠抽身太耐。」

撰文︰Pauline

編輯︰李潔盈

美術︰招潤洪