馬浚偉自認性格辜負好歌 「娛樂圈從來冇改變過我」

馬浚偉入行26年來，最令人深刻當然是他在無綫拍過的35部劇集及扮演的角色，好似《十月初五的月光》的司徒禮信、《洛神》的曹植、《金石良緣》的成日安、《守業者》的潘定揚等等，在電視圈一直站穩陣腳，成為不少電視迷心目中的偶像。不過其實馬仔是參加唱歌比賽入行，於1993年的「第3屆先鋒歌唱比賽」中獲得冠軍後成為歌手，同年加入華納唱片推出首張個人專輯《幸運就是遇到你》，可惜發展不算順利，後來才轉戰電視圈。

馬仔表示：「啱啱入行嗰陣，真係自覺唔適合做歌手或者入娛樂圈，唱片公司宣傳人員對我好好，但佢哋都覺得我好似好成熟但又好內向，性格唔適合。」他表示自己入行前做售貨員，學會面面俱圓，反而因為這樣而失去當藝人應有的獨特個性，他說：「潛意識入面我係好唔開心，依家都覺得自己當時係未Ready，我有同黃柏高講，辜負咗佢當年幫我揀咁多好歌，因為我唱開心歌都會唱到死人冧樓咁，次次都變悲情，（好著重技巧？）係，因為我係一個好講紀律嘅人，而且耳仔好靈敏，個音差1/8我都唔舒服，我唔想走音，我亦唔應該走音，梁月玲老師同戴思聰老師教我出嚟。」

相關新聞：馬浚偉走過抑鬱轉化助人動力 「死後總算貢獻過社會」

{{hket:inline-image name="043f9aba-50e1-4dc3-b2ac-c114f129c553.jpg"}}{{/hket:inline-image}}

(《晴報》圖片)

馬仔直言是個性的關係，由入行開始都好自律，他說：「好多人話娛樂圈係大染缸，但我覺得到依家嚟講，娛樂圈都冇影響我、冇改變過我，我依家同26年、36年前嘅馬浚偉係一樣，可能我個性比較固執，好難先改到我。」或者是外表的關係，馬仔過往都是演正氣、乖乖仔的角色，他說：「好多角色都係好正氣，但其實我唔想，你問我悶唔悶？我真係會悶，所以依家自己做編劇、做創作人，可以挑戰好曳嘅角色，唔係再留喺以前個框架入面。」

今次馬仔繼續將自己夢想實現，決定在10月24至27日和11月1至3日在香港演藝學院香港賽馬會演藝劇院舉辦7場《馬浚偉Dream Big》個人演唱會，重拾當初入行的初衷，他表示：「去年已經開始開會籌備，成個演唱會概念都係我搞，我係兼任監製，我原本打算用《放學ICU》首歌嚟開場，你知唔知《放學ICU》陪伴幾多人成長？不過每次節目播出都冇打我個名上去，好多人唔知係我唱，仲以為係隻『蔥蔥』唱！」

相關新聞：馬浚偉出錢出力救弱勢捱到生疹 曾尋死歷六大低潮：細妹媽媽患癌

{{hket:inline-image name="gJ89tb.jpg"}}{{/hket:inline-image}}

(圖片：網上截圖)

馬仔至今快將48歲，近年逐步想將自己未圓的夢實現，至於會否希望找個伴侶陪佢終老呢？他說：「我已經有一套好明確嘅生活態度，身邊有幾位紅顏知己同我好夾、好有默契，大家相處得好開心，係咪一定要結婚同生仔先叫圓滿呢？呢一刻我唔認為，但我唔抗拒任何事發生。我係基督徒，我唔怕死，但我唔想，因爸爸好健康，我唔想佢難過。如果上天突然要我離開，我可以接受，最緊要快，唔好累到屋企人要照顧我就得喇！」

{{hket:inline-image name="ca2052fd-2fa6-4063-abc7-ea7ef1b03efd.jpg"}}{{/hket:inline-image}}

(《晴報》圖片)

馬仔經歷過家人的離開、情緒病的困擾和事業的低潮，他從來沒有放棄過往前走的動力，他說：「大家經常高估困難，矮化自己能力，就會覺得困難好大，其實兩者要平衡，如果你有心去做一件事，你要先相信自己做得到，有三句說話我成日用：『Hope for the best，Prepare for the worst，and expect nothing ！』(盼望最好結果，備戰最懷情況，不作任何期望)」

場地提供：i-club Hotel
髮型：Frankie Tang
化妝：李紫君@Yannie’s Makeup