現年39歲嘅曾國祥雖然曾話過自己係「不婚一族」，但隨住佢同細自己12年嘅王敏奕拍咗拖六年，舊年仲搬埋一齊喺貝沙灣共賦同居，唔少人都睇好佢哋最終會修成正果！日前就有消息指兩人已秘密於日本拉埋天窗，曾國祥爸爸曾志偉就冇聽電話，而身在台灣嘅曾國祥家姐曾寶儀就冇否認喜訊，仲好似神神秘秘咁回應話：「呢啲等佢本人答會好啲。」至於王敏奕嘅好友糖妹，就話冇聽過王敏奕結婚嘅消息。
▲好姊妹糖妹（左）話冇聽過～（王敏奕 Instagram）
▲家姐曾寶儀（右）都好口密！（東星娛樂）
曾國祥同王敏奕一齊拍電影《囡囡》時結緣，但拍《囡囡》時因為戲入面唔係同一條線所以二人仲未互相認識，之後喺電影節同拍戲時多次合作，再互相了解，王敏奕話當時覺得曾國祥幾好，二人好自然就開始咗。
▲二人經常放閃。（王敏奕 Instagram）
王敏奕被指成功「收服」以往形象花弗嘅曾國祥，不過佢就話男友本身都係一個好乖嘅人！可能係隨住年紀增長settle down。
王敏奕當正男友曾國祥係男神，大讚佢有氣質、有才華、對朋友好好、好有義氣！仲話男友有時會話佢冇義氣，王敏奕有時同曾國祥講：『我約咗人，但我又想陪你喎，咁點？』曾國祥就會叫佢唔好咁冇義氣甩底。佢話曾國祥唔會刻意製造驚喜，但一啲佢覺得做咗會令王敏奕開心嘅嘢佢就會做，認真Sweet爆！
▲ 王敏奕與曾國祥感情穩定，經常恩愛出席公開場合。（東星娛樂）
▲ 老夫老妻咁款。（東星娛樂）
▲形影不離。（王敏奕 Instagram）
▲（王敏奕 Instagram）
▲（王敏奕 Instagram）
王敏奕曾於Instagram上載同志偉及曾國祥嘅3人合照，仲留言話：「我們的眼都笑成了一條線 ，老爺生日快樂 ❤️」雖然好多人都會叫志偉做「老爺」，但對於王敏奕嚟講係有特別意思，因為喺以前佢就話只會叫志偉做「Uncle」，改口叫「老爺」睇嚟大家關係已經昇華咗！
曾國祥老竇曾志偉更早已視王敏奕是「新抱仔」，唔少活動都會預埋王敏奕，而女方去年亦「放聲氣」指拍拖多年應要考慮結婚問題，如今傳出結婚喜訊，當然可喜可賀！
▲ 好襯呀！（東星娛樂）