今年嘅香港小姐競選3甲已誕生，由黃嘉雯、王菲、古佩玲分別攞冠亞季軍。部分網民好滿意結果，話今年個個都靚，邊個攞獎都值；亦有部分網民留言話開始懷念以前嘅港姐。日前，TVB上載咗3條片回顧1973年至2018年嘅港姐得主。綜合網民意見，唔知呢10位最靚港姐（排名不分先後）係咪你心目中嘅選擇呢？
1977年冠軍：朱玲玲
朱玲玲曾經被譽為最美麗嘅港姐，除咗冠軍，仲攞埋最上鏡小姐獎項。
網民留言：「佢外表都keep到，舉手投足高貴優雅，成日做善事，說話大方得體，美貌與智慧並重」、「公主一樣出塵嘅美」、「當年佢真係驚艷全城，好似全港未見過咁靚嘅女仔咁，後來嘅港姐都無咁哄動嘅情況」。
(myTV SUPER截圖)
1983年亞軍：張曼玉
張曼玉除咗獲得港姐亞軍，仲贏到最上鏡小姐獎項。同年，佢代表香港赴英參加世界小姐選美並進入前15名。
網民留言：「張曼玉嘅靚係脫俗得嚟帶點平凡」、「最靚係佢，笑得甜」。
(myTV SUPER截圖)
1988年冠軍：李嘉欣
李嘉欣除咗係港姐冠軍，仲係首屆國際華裔小姐冠軍，李嘉欣當時只得18歲。
網民留言：「呢個先係我終極女神，要揀個小說美若天仙嘅人物捨佢其誰」、「成個樣都搵唔到一忽可以挑剔」。
(myTV SUPER截圖)
1989年冠軍：陳法蓉
陳法蓉除咗係港姐冠軍，亦係國際華裔小姐亞軍，擁「香港女神」稱號。
網民留言：「客觀論，整體樣貌、身材、皮膚，陳法蓉都正」。
(myTV SUPER截圖)
1991年冠軍：郭藹明
郭藹明奪冠之餘同時贏得國際親善小姐及最佳談吐幽默獎；其後參選國際華裔小姐競選，摘下亞軍同最佳民族扮相獎。
網民留言：「佢好有知性美同氣質」。
(myTV SUPER截圖)
1991年季軍：蔡少芬
蔡少芬係中越混血兒，擁4分之1越南人血統，17歲就以大熱姿態獲季軍。
網民留言：「甄宓係最巔峰時期，嗰種氣場得佢一個做到，成個仙女咁」。
(myTV SUPER截圖)
1994年冠軍：譚小環
譚小環當年被外界視為3甲人選嘅大熱門之一，最終佢不負眾望力壓群芳。
網民留言：「90年代港男夢中情人嚟㗎」。
(myTV SUPER截圖)
2012年季軍：朱千雪
朱千雪本身係民選冠軍，因為當年系統伺服器出錯變季軍，2017年就獲網民高票選為「10大最索港姐」。
網民留言：「眼大輪廓深，一出嚟就好得人鍾意」、「走晒黎姿、李嘉欣嗰班靚女後，第一次見到真正靚女」。
(myTV SUPER截圖)
2016年冠軍：馮盈盈
馮盈盈除咗奪冠，仲贏得「現場最受歡迎佳麗獎」，喺國際中華小姐競選中亦得季軍。
網民留言：「已經立體過大部分香港華人」。
(myTV SUPER截圖)
2017年亞軍：何依婷
何依婷除咗奪得亞軍，亦贏得莎莎美麗觸覺大獎。
網民留言：「點解會唔係佢贏冠軍？好甜、靚，近年好少咁高質素」。
(myTV SUPER截圖)
▼1973 - 2018香港小姐回顧．港姐冠軍合集
▼1973 - 2018香港小姐回顧．港姐亞軍合集
▼1973 - 2018香港小姐回顧．港姐季軍合集
撰文：張芷晴