蓬瀛仙館捐$2000萬 提升新界區醫療服務

蓬瀛仙館今年適逢建館90周年，推出咗「共建健康社區捐獻計劃」，噚日就舉行咗捐獻儀式，黛安聽公關姊妹講，佢哋合共捐出超過2,000萬元喺新界各區提供醫療護理服務，體現「助人為快樂之本」嘅精神！

公關姊妹話，「共建健康社區捐獻計劃」共捐獻2,056萬元支持新界區多項醫療服務，其中北區醫院將設立新界第一間一站式「泌尿外科檢測中心」，捐助金額高達1,470萬元，中心會增設唔少先進專科設備，希望優化服務同縮短病人輪候嘅時間。

另外，仁濟醫院亦都獲250萬元贊助，推出香港第一架「感創智善流動車」，可以幫助行動不便嘅認知障礙症患者接受治療，以趣味、互動嘅方式，延緩認知障礙患者退化速度，同埋及早識別患者。其餘捐款就用嚟支援北區醫院服務、博愛醫院中醫流動醫療車及大埔促進病人護理、康復和教育嘅設備。

黛安聽新界東聯網泌尿外科吳志輝教授講，「泌尿外科檢測中心」可以將以前分布喺唔同部門嘅服務統一，大大改善服務質素，令病人輪候時間縮短，令患者盡快得到治療，佢希望中心可以喺今年動工，下年底就可以啟用，預計首年服務人數為6,000人。而仁濟醫院董事局主席王賢訊亦預計「感創智善流動車」首2年服務人次可達1.8萬人。

雅麗氏何妙齡那打素醫院內科部門主管，及大埔醫院內科及老人科部門主管李舜華醫生話，非常感謝蓬瀛仙館嘅捐贈，令到醫院可增添全新醫院設備，包括電動沐浴床、電動老人椅及多功能大電視機等等。

黛安知道，蓬瀛仙館一向積極參與社會慈善項目，相信今次計劃可以改善區內醫療設備外，亦惠及不少市民。