由鄭則仕、邵美琪同苑瓊丹等主演嘅無綫劇集《街坊財爺》播出一星期，故事講到飾演「財仔」大老細嘅鄭則仕畀曾航生飾演嘅「債仔」追斬，曾航生好似癲咗咁追住鄭則仕不停揮刀，之後講到自己努力工作都還唔到「利疊利」嘅債務，老婆仲要有第3期胃癌，真係慘絕人寰呀！
▲（電視截圖）
▲（電視截圖）
▲（電視截圖）
之後佢老婆打電話勸佢唔好傷害人，曾航生一聽到老婆把聲就喊咗出嚟，一個場口幾種情緒，演技入木三分，好搶戲呀！
▲（電視截圖）
唔講可能好多新生代都唔知，現年55歲嘅曾航生並唔係演戲出身。1987年曾航生參加亞洲電視第2屆未來偶像爭霸戰並無獲得任何獎項，後來勝出省港杯歌唱比賽後加入無綫電視拍攝劇集，再做歌手。
▲曾航生與陳松伶（電視截圖）
1990年曾航生喺各大傳媒嘅年終頒獎禮上，先後獲得香港電台十大中文金曲「最有前途新人獎」金獎、商業電台叱吒樂壇流行榜「叱吒樂壇生力軍男歌手」金獎、TVB十大勁歌金曲「最受歡迎新人獎」銀獎等，力壓同佢同期出道嘅黎明，喺樂壇嘅風頭一時無兩。
▲黎明（東星娛樂）
可惜曾航生嘅聲勢後勁不繼，雖然佢堅持音樂創作，繼續埋頭佢嘅音樂事業，但卻未有起色。曾航生當時嘅女友梁安琪瞓身支持佢，有傳曾航生灌錄HiFi發燒碟，都係梁安琪出錢出力。直至2014年二人分手收場，有報道指曾航生要搬離同女友喺大尾篤嘅村屋愛巢。
▲曾航生同前女友梁安琪拍拖20年，直至2014年分手，梁安琪多年來都對男友嘅音樂事業瞓身支持。（東星圖片）
2012年曾航生返到無綫拍劇，經常飾演反派、賤男角色，非常入屋。他早前接受電台訪問時，突然自爆4年前同大陸女友「加菲」旅行秘婚，兼且已經生埋女兒桐桐（乳名：「大棵菜」），難怪近年密密拍，經常都喺電視上見到佢嘅出現，原來係要勤力搵奶粉錢呀。
▼依家女兒已經差唔多1歲半，曾航生父愛爆棚，不時喺社交網晒囡囡可愛得意嘅成長照，明顯錫到囡囡燶！（曾航生微博）
▼眼大大，勁Kawaii！（曾航生微博）
▼大個一定好靚女啫！（曾航生微博）
撰文：黃蘊姿