備戰處女個唱 田蕊妮忍口無啖好食

田蕊妮（阿田）將於本月20日假旺角麥花臣場館舉行演唱會，連日來阿田積極備戰，昨日她綵排時，笑言最難並非記歌詞，反而是美食當前要忍口最辛苦。

田蕊妮昨日在土瓜灣綵排時，坦言處女開騷心情十分緊張︰「緊張咗一段時間，好多嘢要記，好似稿、歌詞同結他譜，好怕到時唔記得。」她表示檢視rundown過後，發現演出時間太長，要忍痛刪走兩部分。她說︰「今次演唱會同平時觀眾睇嘅有啲唔同，我有好多嘢想講，依家一場真係講唔晒，如果有機會畀我開幾場，真係可以晚晚唔同內容。」

阿田自言為了準備個唱，每日食得清淡，過着刻苦生活︰「呢排無時間做gym，依家要操番個body，我最驚係中秋節，好想食月餅，我老公（杜汶澤）成日遞個月餅畀我聞下係咩味，連凍飲都要戒，因為怕影響聲帶。我依家直頭挑戰緊Rocky（洛奇）嘅生活，狂做運動但係食得清。」提到近日因社會事件，不少演出有可能臨時延期或取消，她說︰「未發生嘅事就唔去諗，依家專心綵排。」

慶祝拍拖20周年

提到杜汶澤前晚在社交網po了與阿田於99年剛拍拖時的舊照，不少網民大讚二人甜蜜，更指阿田樣貌20年不變。阿田笑說︰「係我隔籬嗰個嘅樣變咗，唔係我。」另外，她早前發文指「江湖再見」，疑似離開無綫，她澄清只是一時感觸︰「真係唔好意思，其實因為要做演唱會，嗰次又係最後一次劇集宣傳，無時間同大家食飯，又唔知幾時再見，感觸起嚟先寫咗呢番說話，引起大家誤會，唔好意思！」

採訪︰Pauline

編輯︰李潔盈

美術︰梁政敏

攝影︰林良明