首拍ViuTV節目 金剛麥包帶師奶去旅行

金剛與麥長青（麥包）昨日出席ViuTV新節目《C9旅行團》記者會，二人下月將與十多位師奶到台灣拍外景。麥包表示他們沒有做guide（導遊）的經驗，誰知聽力麻麻的金剛竟聽錯做「雞」，相當搞笑。

金剛與麥長青今次首度與ViuTV合作，他們下月將往台灣拍攝兩星期。雖然台灣是金剛的家鄉，但他笑稱完全不熟悉台灣吃喝玩樂的地點，皆因他自從搬回台灣居住後，已變回宅男。他說︰「雖然我鍾意留喺屋企，但無可能招呼大家嚟㗎嘛。」提議一行人屆時到金剛家中煮飯仔？麥包即舉腳贊成︰「金剛都公開咗有女友，唔怕伯母誤會啦！」

提到金剛早前在社交網吐苦水，因而傳出與台灣女友梁云菲情變，他否認說︰「唔關感情事，係同朋友嘅友情生變，一時有感而發啫。」平日多與後生靚女合作的金剛，今次節目與師奶同行會否不慣？他說︰「唔可以咁講，雖然我都有問過監製，今次係親情感覺，幾窩心。」他大讚麥包粵曲、流行曲都識唱，所以受師奶歡迎，麥包則說︰「我哋無做guide嘅經驗，唔知點招呼大家。」金剛聞言說︰「做雞？」麥包即抵死回應︰「做導遊呀，我們最多都係做『鴨』啫！」

撰文︰Pauline

編輯︰李潔盈

美術︰梁政敏

攝影︰林良明