李佳芯被雪藏黎諾懿變炮灰 《BB來了》大執位馬明同邊個頂上？

2018年李佳芯同黎諾懿主演嘅無綫劇《BB來了》贏盡收視同口碑，更令李佳芯榮登視后寶座。原本劇集一早已計劃於9月底原班人添食開拍續集，但李佳芯被無綫雪藏，一直被演員檔期拖住。現時無綫決定全面換角大執位，雖然故事仍以BB系列為主題，但男、女主角都冇得留低，拍檔黎諾懿都慘變炮灰。

{{hket:inline-image name="TUNGSTAR6101019.jpg"}}{{/hket:inline-image}}

李佳芯指自己本身都聽過會有改動，唔知會改成點。佢又表示劇集本身都同其他工作撞期，負荷唔到拍完一套30集再拍一套25集，有講過唔拍住。問到拍檔諾懿被拖累，佢就話唔擔心，話黎諾懿本身都有好多綜藝節目，無綫都有好多劇，唔驚冇得做，仲話每個演員都有價值，都會用得着。

{{hket:inline-image name="TUNGSTAR6101027.jpg"}}{{/hket:inline-image}}

黎諾懿就話覺得可惜，但亦好體諒：「《BB來了》係我同佳芯嘅一個佳作，其實拍續集如果冇咗邊個都唔好，唔再係原汁原味，所以起用其他人拍都啱，以全新嘅陣容，全新嘅古仔去睇。」黎諾懿講到拍續集都有壓力，依家咁都有個美好嘅回憶。

{{hket:inline-image name="TUNGSTAR6101423.jpg"}}{{/hket:inline-image}}

據知馬國明同岑麗香會頂上成為《BB來了》續集嘅男、女主角，今次將會係香香產後復出第一炮。馬國明就話未正式收到公司通知，依家忙緊拍攝《使徒行者3》，要拍到年底：「公司安排我哋就要拍，有得開（劇）固然開心。」馬明同香香之前都曾經合作拍攝《為食神探》，大讚香香係會令到同事好舒服嘅演員。

{{hket:inline-image name="TUNGSTAR5805280.jpg"}}{{/hket:inline-image}}

不過原來當年《BB來了》李佳芯嘅角色都係由岑麗香出演，但因為當時係香香結婚後第一年，想返加拿大陪屋企人而令佢冇接到呢個角色。世事如棋，估唔到一年後女主角又變返香香咁峰迴路轉。

（圖片來源：東星娛樂）

撰文：黃蘊姿