無綫新劇《金宵大廈》將於下星期一（16日）首播，康華於劇中其中一個單元飾演美魔女中醫師，教人用古怪方法扮靚。康華為藝術犧牲化皺紋妝，用3層膠水，卸妝都要慢慢一層層卸，好傷皮膚！不過佢話出到嚟效果好逼真，所以完全唔計較。專業嘅康華從影多年，除咗犧牲靚樣之外，仲曾經為事業犧牲埋姻緣。
（《金宵大廈》劇照）
康華1994年參選港姐而入行，因早期常飾演青樓女子、情婦及小三等角色，故有「御用情婦」嘅稱號。康華表示因為角色太深入民心，令佢先後2段感情「撻Q」，原因係畀男方家人睇唔起，令佢覺得唔受尊重而斬情絲。
都冇乜變～（電視截圖）
「邪花」形象被定格。（電視截圖）
《陀槍師姐３》「心姐」一角令人印象深刻。（電視截圖）
父母年邁加上患有心臟病，曾因康華未有在旁照顧幾乎出事，康華便毅然推咗2套達7位數字酬勞嘅大陸劇，返港照顧雙親：「當時我人在大陸，只係電話了解父母病情唔夠，有幾次我趕返嚟先救得返父母，佢哋有心臟病，唔係工人可以照顧得嚟！」
事親至孝。（康華微博）
康華更花費近百萬積蓄，畀父母做心臟同眼部手術，無半句怨言，並說：「錢係冇咗，但我有多咗時間睇我父母，覺得好幸福。以前有錢咪帶父母睇私家醫生，依家冇，咪轉睇公立，原來公立醫院嘅醫療設備都好完善。其實最大分別係探病時間較嚴謹，醫生都好體諒我，有時會通融我，又會耐心講解畀我聽！」
早前爸爸雙腳水腫嚴重。（康華微博）
（康華微博）
在康華悉心照料之下，84歲嘅爸爸病情有好大進展：「之前去洗手間都唔得，行唔到，手、腳震晒，要瞓牀，但最近情況好轉，血含氧量合格，我先夠膽帶佢出嚟曬吓太陽，做吓運動！」
（康華微博）
現年47歲嘅康華，至今單身10年，但佢一啲都唔心急：「其實我真係冇人追，『真命天子』未出現，我就利用呢段時間好好珍惜同父母相處，都係一件好幸福嘅事！」佢更話自己未遇過好男人：「不過唔緊要啦！我自己都應付到，都覺得幸福。」佢話自己好少放時間喺愛情方面，仲話自己搵錢對女性係好緊要，唔強求，一切順其自然。
47歲，Keep得好好！（康華微博）
素顏都好靚～（康華微博）
撰文：黃蘊姿