「荔園」重臨 建微縮模型 重拾港人集體回憶

荔園係好多市民嘅集體回憶，原來今年係荔園成立70周年，黛安聽公關姊妹講，由即日起到下個月13日，D2 Place會舉辦「我們的荔園」展覽同嘉年華。活動最特別嘅係首次展出由本地著名微型藝術單位TOMA Miniatures製作嘅荔園遊樂場1︰64微縮模型，黛安都想去睇呀。

公關姊妹話，呢個微縮模型係根據70至90年代全盛時期嘅荔園遊樂場製作，參考埋以前嘅相片，以1比64比例重新整出嚟。個模型會有荔園城堡、百麗殿舞台、動物園同宋城等地點，黛安就覺得入面以動態展示嘅遊樂場設施好得意，好似旋轉木馬、咖啡杯、摩天輪、海盜船等等，就好似真嘅一樣。

荔園嘅主題遊戲大家仲記唔記得呢？今次同場嘅嘉年華就會有「荔園百發百中」、「放電肥肥人」、「天奴香蕉池」等遊戲，等大家可以重溫舊時嘅回憶。公關姊妹仲話，「荔園3D遊樂園」有全新創作嘅AR擴增實境遊戲，而「荔園x Babe Hero」仲會為小朋友提供多款角色扮演遊戲。

依家去到會場用80蚊就買到入場門票同6個遊戲代幣喇，另外，仲有「荔園.流金歲月」套票、Babe Hero套票2款門票可揀；如果想知道多啲活動最新詳情，可以留意D2 Place fb專頁同官方網頁嘅公布。未去過荔園嘅朋友，快啲去體驗下啦。