以奇幻懸疑為題材的新劇《金宵大廈》喺昨日嘅黃金時段首播，黃祥興喺劇中扮演一個大陸團導遊，第一集出場就刁難飾演看更嘅陳山聰，同佢以往經常飾演一啲富二代、貴公子嘅形象截然不同。
（東星娛樂）
（黃祥興IG）
黃祥興於2005年參加香港先生，憑着佢嘅法國口音，加上一對電眼成為大熱。雖然最後輸畀高鈞賢，但黃祥興加入無綫後，演出機會比對方更加多。黃祥興33歲就結婚生B，藝人嚟講可以話係非常早婚，多數男演員都覺得單身會發展得好啲，但黃祥興並唔介意：「我覺得人生好短暫，既然想有下一代，不如早啲生，一嚟同佢哋年紀唔會相差太遠；二嚟自己有體力去照顧同陪佢哋玩。」黃祥興當年一家6口移居法國生活，人在外地，家人之間互相依靠，形成佢重視家庭嘅性格。
4兄弟姊妹感情非常好，細佬黃長發（中上）早年仲跟隨哥哥嘅腳步參選香港先生。（黃祥興IG）
黃祥興同太太Peggy於2013年結婚，先後誕下一女一子。黃祥興係Peggy嘅初戀，兩人拍拖1年半就決定結婚。黃祥興當年求婚花盡心思，請咗近30位臨記幫忙，旅行時坐完直昇機就為太太送上驚喜，預先為Peggy準備咗婚紗並跪地求婚，Peggy都毫不猶豫就答應。靚仔花弗嘅定律畀祥興打破咗，Family Man形象慢慢建立起嚟。
（黃祥興IG）
黃祥興雖然喺法國長大，但就流住潮州人大男人嘅血。佢曾要求玩空手道嘅Peggy唔好再玩，因為覺得唔優雅，差啲考黑帶嘅Peggy亦乖乖聽話改去學跳舞。不過祥興事後都感到內疚，支持太太重拾興趣，愛佢就愛佢嘅全部。
（黃祥興IG）
特登去睇老婆比賽，好Sweet！（黃祥興IG）
40歲又做埋老竇，但佢仍然對自己嘅身形好有要求，不時鍛練。
（黃祥興IG）
女兒出生後，黃祥興一直同佢講法文至1歲大，太太就同佢講英文及廣東話。後來太太覺得囡囡要準備入學面試，希望專注在中、英文上，祥興就冇再同囡囡講法文，之後再同佢講返法文，囡囡已一頭霧水。早幾個月祥興同法國朋友聚會，見到朋友同子女以法文溝通，開始後悔自己冇好好堅持：「年幼嘅時候好容易吸收，我5歲隨家人移居法國，都可以學另一種語言，我覺得子女都可以。」呢個暑假祥興堅持同小朋友講法文，盡量把法文融入他們的生活當中。
（黃祥興IG）
祥興希望囡囡入讀傳統學校，但唔強求入名校，會以學校係咪適合小朋友做優先考慮，而唔係追求一間父母心儀嘅學校，仲話小朋友健康快樂先係佢最大嘅願望。
（黃祥興IG）
撰文：黃蘊姿