黛安
黛安

24小時慈善小艇賽下月舉行 玩水上活動為病童籌款

發佈時間: 2019/09/18

24小時慈善小艇賽下月舉行 玩水上活動為病童籌款

提起水上活動,唔少人會即刻諗起外國,其實香港都有好多水上活動玩㗎!黛安知道,白沙灣遊艇會年度盛事「24小時慈善小艇賽2019」即將喺下月5至6日舉行,同場仲附設嘉年華競賽村,兼可免費試玩各類小型帆船、獨木舟、直立板等,絕對係假日好去處。

公關姊妹同黛安講,呢個24小時慈善小艇賽由2002年已開始舉行,主辦嘅白沙灣遊艇會至今已為選定嘅慈善機構籌集超過1,000萬港元善款,本年度嘅受惠機構包括兒童癌病基金、親切TREATS、勵智協進會、Sailability Hong Kong,以及支持西貢區社區中心嘅社區項目。

大人細路到時除咗可以到場欣賞賽事外,仲有免費公眾水上活動試玩,以及兒童天地、自助繪畫、現場音樂表演、空中瑜伽表演同面繪藝術等,現場亦會特設尋寶遊戲,只要到訪各個有份參與嘉年華嘅慈善機構攤位,收集滿蓋章,即有機會獲得豐富獎品,咁多精采活動,黛安都同姊妹去打卡先得!

撰文: 黛安 消息特靈八卦公關
欄名: 八卦名利場