東京生活館登港 限定福袋$50起 下周尖咀連開2店 即掃日本藥粧

香港人平時最鍾意去旅行，尤其係去日本血拼！等黛安講個好消息畀大家知，嚟緊大家喺香港都可以買到好多日本筍貨喇，因為日本大型人氣連鎖藥粧店「東京生活館」（Tokyo Lifestyle）將會正式進駐香港，下星期三（25日）率先喺尖沙咀隆重開幕，有成過千個日本人氣藥粧及護膚品牌，仲有好多獨家開幕優惠㖭！

黛安知道，東京生活館係日本極受歡迎嘅大型連鎖藥粧店，喺關東地區已經有8間實體店，海外特許經營店更遍布美加地區，提供逾千個品牌，多達55,000種產品，包括護膚、彩粧、洗髮護髮產品、保健產品、母嬰用品、日本零食等，真係應有盡有。

今次佢哋嚟到香港，仲會一口氣連開兩間分店，分別係25日喺尖沙咀海港城港威商場，同埋26日喺美麗華廣場2期隆重開幕，其中美麗華店佔地更超過4,000呎，將同步引入多款日本主流嘅熱賣品，必定會成為最新藥粧入貨熱點啦。

公關姊妹仲透露，新店會特設多重開幕優惠獎賞，包括香港店獨家精選福袋，分別只售50蚊同200蚊；首100位會員仲可以自動成為永久會員；憑消費免費派發過千塊面膜；仲可以大玩「美粧扭蛋機」，或美麗華店限定嘅Motion Magnet動態相片磁貼趣拍站，以及換領手機指環扣等。優惠咁豐富，黛安都要抽時間去掃貨先得。

兩分店地址

美麗華店：尖沙咀彌敦道118-130號美麗華廣場2期1樓172號舖

SHIBUYA109海港城店：九龍海港城港威商場3樓3002號舖