聖雅各福群會藝展 拉近傷健距離

藝術可以治癒心靈，亦可以拉近人與人嘅關係。黛安知道，聖雅各福群會復康服務賽馬會啟藝學苑最近籌辦《牽手藝同行2019》，主題係以「異」作主，藝術作媒，品味人與人之間嘅「異」與「同」。呢個計劃係由香港藝術發展局、悟宿基金會及黃廷方慈善基金資助，並由信和集團旗下嘅利東街及荃新天地提供場地進行活動。

計劃嘅焦點活動《D-MEN異人盟》藝術夥伴創作計劃，係由本地藝術家陳翹康領軍，率領新晉藝術家，包括畫家葉雯、雕塑藝術家林繁盛同張穎欣等，交流藝術靈感同技術，共同創作。10月5至7日舉行嘅「D-MEN」展覽將包括繪畫、藍曬、立體創作和錄像等，夠晒多元化。

公關姊妹仲話，同樣喺下月5日舉行嘅「異，FUN也」藝術分享日，都係喺灣仔利東街舉行，現場有藝術體驗攤位、音樂同舞蹈演出，同街坊分享多元藝術媒介嘅趣味，而且費用全免㗎。計劃仲有另一個重頭戲，就係復康人士舞團「心飛舞團」嘅表演，佢哋用舞蹈訴說特殊需要人士家長從懷孕、孩子出生到成長嘅心路歷程，故事感人又精采，大家千祈唔好錯過啊。