黛安
黛安

主題館登陸山頂廣場 玩實景棋盤大富翁

發佈時間: 2019/10/03

主題館登陸山頂廣場 玩實景棋盤大富翁

桌遊大富翁,黛安細個成日玩,仲次次都做到大富翁!黛安知道全球首個大富翁主題館「大富翁夢想世界™」喺香港太平山山頂廣場3樓,今個月26號就開幕啦,最快下星期起就可上官網預訂開幕翌日(27日)至90日內嘅門票,成人同小童票價分別係260蚊同220蚊。

主題館入面有8個展區,用全息投影同4DX等技術,立體還原銀行、地契卡、棋子、水務局、機會等大富翁經典元素。真係好似入咗去大富翁個遊戲入面咁㗎。

黛安仲知道,主題館入面個火車站4DX影院,每次可容納約16人欣賞4分鐘嘅迷你電影,入面張凳仲會郁、又會噴水霧,好好玩。仲有大富翁超級電子銀行可執「錢」,大家到時只要掃描門票上面個QR Code,就可以喺限定時間收集亂咁飛嘅大富翁紙幣換獎品。

玩完當然要去水務局同監獄打卡。走之前去埋幸運輪度掃下QR Code抽獎就完美,人人都有㗎,獎品包括場內小食禮券、化粧品禮券、機票等。館內由遊樂、購物、抽獎,到獎品換領都採用二維碼技術,簡單方便。

大富翁夢想世界營運總監陳景邦話,主題館自2016年起,用4年斥逾1億港元籌備,期望1年有60萬人次嘅人流。雖然依家社會氣氛緊張,但佢表示情況只係暫時性,相信好快好轉。

「大富翁夢想世界™」主題館

地址:香港山頂118號山頂廣場3樓

門票︰成人$260、小童$220

預訂︰下星期尾起可預訂10月27日起至90日內門票

開放時間︰早上10時至晚上10時,1日6時段

撰文: 黛安 消息特靈八卦公關
欄名: 八卦名利場