香港公營房屋係經由政府、公營機構或非牟利機構為低收入市民而興建，可分為出租永久房屋、資助出售房屋、出租臨時房屋數種。於2017年，居住喺各類型公屋嘅市民佔香港人口44.7%。不過呢44.7%當中仲未包括已經賣咗嘅公屋。所以香港實際應有超過一半人口係居於公屋。香港嘅普通打工仔上車難過登天，而公屋嘅租金相宜之餘，仲要比一般私樓面積大同間格實用，所以抽到間公屋可以話係開心過中六合彩！
（香港房屋委員會及房屋署圖片）
更何況「寧欺白鬚翁，莫欺少年窮」，香港有唔少成功人士都係公屋出身。以下我哋就一齊數吓娛圈中有邊個「公屋仔女」撈到風生水起！
北角模範邨
譚詠麟
年年25歲嘅樂壇校長譚詠麟，以前曾經喺全港最老的屋邨之一北角模範邨居住，佢曾經講過細個嘅時候鍾意去附近嘅球場踢波。
▲（東星娛樂）
蘇屋邨
許冠傑
香港歌神許冠傑（Sam）原與家人包括兄長許冠文等在鑽石山木屋區居住，後終「上樓」入住蘇屋邨。Sam曾自爆愛在屋邨後樓梯練結他，又愛在走廊與兄長一起彈結他冧女。Sam創作嘅好多歌曲都非常貼地，如《賣身契》、《半斤八兩》、《加價熱潮》、《制水歌》等，反映低下階層生活苦況，加埋歌詞琅琅上口，令佢喺70至80年代風頭一時無兩。
▲《東張西望》截圖
▲網上圖片
黃家駒、黃家強
黃家駒、黃家強當年就是住喺蘇屋邨茶花樓3樓388室。家駒少年時本來喺家中練習結他，家人不堪聲浪困擾趕他出屋外，佢就改為坐喺屋邨嘅樓梯彈奏。
▲《東張西望》截圖
▲《東張西望》截圖
其他喺蘇屋邨大嘅明星仲有：
▲蔡楓華（東星娛樂）
柴灣興民邨
李佳芯
李佳芯自小居住於柴灣興民邨，先喺有線電視做體育主持，其後加入TVB，憑《學是學非》被封宅男女神，近年更頻頻於TVB劇集中亮相，備受重用。
▲（東星娛樂）
筲箕灣明華大廈
郭富城
天王郭富城喺筲箕灣房協嘅明華大廈同家人居住，直至入行後先搬出，因住開有感情城媽初時都不肯搬走，出名孝順嘅城城花盡唇舌城媽先肯遷出。
▲（東星娛樂）
馬鞍山恆安邨
恆安邨於1987年落成，係馬鞍山新市鎮首個入伙嘅公共屋邨，亦是租者置其屋計劃嘅首批屋邨。當年神劇《大時代》都喺嗰度取景！
▲《大時代》劇照
▲《大時代》劇照
黃翠如
黃翠如爸爸幾年前晉升為上市公司主席，一夜暴富身家過億！原來黃父曾係賣魚小販，於牛頭角街巿擺檔，翠如更自爆細個會去檔口幫手。黃翠如曾經同家人住過藍田木屋區，之後一家7口「上樓」馬鞍山恆安邨。
▲（東星娛樂）
容祖兒
天后容祖兒同黃翠如曾經係鄰居！容祖兒與黃翠如嘅家姐仲係小學同學，細個嗰陣翠如更曾因不滿容祖兒「搶走」姐姐，叫容祖兒到操場講數！2人到依家仍然係好朋友。
▲王祖藍與容祖兒。（東星娛樂）
王祖藍
王祖藍細個全家都係住恆安村，發跡後亦非常念舊，知道媽媽唔捨得一班舊街坊，就買咗發跡公屋畀阿媽，等阿媽幾時返去住吓都得。
楊怡、楊卓娜
楊怡同樣都喺恆安長大，睇嚟恆安邨嘅風水唔錯！
▲（東星娛樂）
香港仔華富邨
華富邨係香港最著名嘅公共屋邨之一，因部分樓宇可以睇到海景，仲鄰近豪宅貝沙灣，所以普遍被人稱為「平民豪宅」，公屋嘅租金，豪宅嘅享受。
譚小環
94年港姐冠軍譚小環自幼住華富邨，母親喺邨內做小販賣睡衣，佢細個嘅時候都經常同母親去開檔。
▲（東星娛樂）
阮小儀
阮小儀喺華富邨長大，曾就讀廣悅堂基悅小學以及嘉諾撒聖心書院。小儀話就算依家唔喺邨內居住，亦習慣咗一定要睇到海景。
▲（東星娛樂）
周華健
周華健原本居於西營盤第二街嘅源昌隆米店，後來舉家搬到華富邨定居，周華健細個都係入讀當時位於華富邨嘅廣悅堂魯班學校。
▲（東星娛樂）
曾經住過華富邨嘅仲有韋家輝、王貽興同藍奕邦等人，人數之多係公屋明星搖籃嘅第一位！
撰文：黃蘊姿