維他奶冀改變年輕人習慣 推廣乾淨紙包回收

近年環保回收愈嚟愈多人關心，黛安收到風，維他奶將會推出咗一個「乾淨紙包回收活動」計劃，主要係宣揚乾淨飲品紙包回收同減廢信息。活動噚日舉行啟動禮，維他奶香港行政總裁劉盛雪話，將會同本港首間紙包飲品盒回收處理廠「喵坊」合作推行呢個計劃，首階段會喺本港75間中小學推行，預計3年內會將計劃擴展至全港三分之一嘅中小學。

黛安知道，「喵坊」會喺今個月21日啟用，預計每日可處理大約10噸紙包飲品盒。下月計劃更會喺房協轄下觀塘花園大廈試行紙品飲品回收。逐步將回收概念推廣畀廣大嘅學生群，認真唔簡單。

劉總裁仲同黛安講，紙包飲品回收步驟比一般膠樽、廢紙回收處理多，計劃首階段唔適宜太急進，需要配合回收教育，避免回收箱出現處理不當嘅紙包盒，影響回收品質。佢又話，兒童同青少年較易培養良好回收意識，希望可以從「小」培育佢哋，長遠來講就可以令紙包回收成為下一代嘅習慣。

另外，維他奶「紙包回收流動教育中心」今個月亦會派出一部流動車游走多區，實行走入社區回收，又會向市民展示紙包盒嘅製造及回收再造資訊。到時大家只要帶同30個已清洗嘅紙包飲品盒到流動車，就可以換領一包維他無糖茶系列飲品喇。

此外，維他奶嚟緊亦會同理大合作，向7間中小學師生提供工作坊，以回收紙盒為原材料，用3D打印技術製成作品，講解點樣透過分離技術，將紙盒還原成紙漿。回收活動咁有意義，黛安都要通知親戚朋友支持下先得。