現年54歲嘅凍齡美魔女羅霖,1996年下嫁富商劉坤銘後曾淡出娛樂圈,但2012年時宣布同前夫分居,獨力撫養3個仔。單親媽媽羅霖甘願放棄愛情,2016年終同細佢20年嘅內地富二代小鮮肉J君拍拖,仲一時興起拍「婚照」,當時J君更話會為她放棄「傳宗接代」,惜感情只維持咗2年,全因係羅霖覺得經濟壓力大,冇時間經營感情。
(羅霖Facebook)
要囝唔要「仔」
依家羅霖嘅追求者仍不絕,有小鮮肉亦有比佢年長嘅,但為咗3個仔佢統統拒諸門外,認為「男人靠唔住」:「我仲要喺事業上衝刺,起碼要等小朋友大學畢業先。緣分錯過咗未必再有,但我唔會後悔囉。本身壓力太大,再承受感情壓力,我驚我會崩潰。」佢話有幾個對象想「要乸唔要仔」,佢完全接受唔到。不過佢冇奢望3個仔養番佢,仲話佢疊埋心水,同朋友買定「姑婆屋」養老。
3個前世情人都好錫阿媽。(羅霖Facebook)
一個女人捱到喊
羅霖一個女人仔獨力支撐頭家實在唔容易,佢話呢幾年全靠有宗教信仰同有朋友、父母支持先捱得過:「有時閂埋房門祈禱會喊,每個月開支非常大,基本上呢頭賺完嗰頭已經使晒,因為二仔喺美國讀書一年已經要50萬學費,養一個小朋友開支真係好大,我仲要3個就更加犀利。我有紅酒同美容院生意係固定收入,如果冇嘅話真係瞓街㗎!娛樂圈嘅工作唔穩定,可能呢個月有,下個月冇,感恩我暫時個個月都有工開,唔使降價,但可能過多2年老啲就要,如果真係要我降價都願意,為咗屋企冇問題。」
冇男人,但有事業同朋友,生活一樣可以好精彩。(羅霖Facebook)
大仔美國讀Law有阻滯
羅霖3個仔都正在求學,不過原本喺美國大學修讀法律嘅大仔,近日已回港轉讀平面設計。羅霖話自己都同大仔傾咗好耐,因為由頭嚟過嘥咗3年時間同埋7位數字嘅學費,佢都覺得好唔開心:「覺得點解唔體諒媽咪咁辛苦做嘢,但最後都覺得小朋友嘅興趣、健康係最重要,惟有繼續努力做嘢,做到70、80歲囉。」佢話大仔讀法律壓力好大,喺外國讀書亦會受到一啲欺負,要睇自己夠唔夠堅強。大仔讀書冇問題,係性格內向啲,反而係對外、同啲朋友問題處理唔到。
羅霖同大仔似足兩姊弟。(羅霖Facebook)
(羅霖Facebook)
佢又指自己當年屋企經濟環境不好,冇機會讀大學,將來退休也希望去讀大學圓夢。不過值得安慰嘅係,喺美國讀心理學嘅二仔成績好有獎學金︰「雖然錢唔算多,可以幫補一下。希望14歲細仔第時都可以申請到獎學金。」
羅霖二仔同細仔。(羅霖Facebook)
撰文:黃蘊姿