【聲明】港生活網站並無進行電話推廣活動

海港城Brew in the City 靚景靚酒靚咖啡

發佈時間: 2019/10/10

同好朋友約會,點少得美酒或者咖啡。黛安聽公關姊妹講,海港城將聯同本地酒廠H.K. Lovecraft、本地咖啡品牌Roastwork同咖啡分享平台ListCup,喺今個月11日至13日,以及18日至20日,一連兩個周末舉行烘焙咖啡同精釀啤酒節《Brew in the City》,大家可以喺「海運觀點」觀景台一邊睇維港美景,一邊歎美酒咖啡。

今次活動邀請咗超過30個本地同海外咖啡及手工啤酒品牌參加,首個周末仲會有台灣Mr. Lobby Coffee Project、台灣Single Origin Espresso & Roast同日本Trunk Coffee嘅攤位,其創辦人或咖啡師會即場為大家沖調特色咖啡。黛安仲知道,原來12至13日會有首次公開舉行嘅香港愛樂壓比賽,有超過70名咖啡愛好者參加,勝出者會去倫敦迎戰愛樂壓世界賽,同各地冠軍人馬切磋,高手比拼實好刺激啦。

公關姊妹仲話,本地酒廠H.K. Lovecraft同本地咖啡品牌Roastwork為咗今次活動,特別以維也納拉格啤酒配合果仁味咖啡豆,製作咗《Brew in the City》咖啡拉格淡啤酒;並會推出限量版套裝,可以喺Klook網上平台同現場買到。而《Brew in the City》仲同Klook合作推出電子品嘗券,每張售價25元,每次最少要買5張,憑優惠價可換購小杯裝飲品。咁多靚酒同咖啡,大家快啲約埋朋友去試下啦。

《Brew in the City》咖啡拉格淡啤酒

撰文: 黛安 消息特靈八卦公關
欄名: 八卦名利場