《金宵大廈》劇集中比主角還要搶鏡的就是黑貓「靚寶」，不少觀眾都被牠一身黝黑的毛髮和圓碌碌的眼睛所吸引，由「吉祥物」搖身一變成為劇集的「男一」，認真威水！現實生活中，「靚寶」是一隻英短混暹羅貓Mavis，已經有一位緬因貓太太和4名子女，莫非今次拍劇是搵奶粉錢？
「靚寶」主人阿Me絕對稱得上是寵物癡，家養六貓兩狗，她表示Mavis拍劇純粹是機緣巧合，最開心是大家喜歡黑貓、喜歡Mavis之餘，更讓她可以多多分享領養的經驗，希望多多宣揚養寵物的樂趣，並呼籲大家千萬不要棄養。
相關新聞：《金宵大廈》靚寶2歲原名叫Mavis 同大狗同居和平共處
靚寶被網友視為是劇集的男一。(《晴報》圖片)
主人阿Me快將要做媽媽，但絕對拒絕棄養所有貓貓狗狗。(《晴報》圖片)
山聰和靚寶有好多對手戲。(圖片：陳山聰IG )
靚寶是天生識演戲的明星貓。(《晴報》圖片)
劇集招募黑貓幫助加強劇情的神秘感，阿Me沒想到抱著嘗試的心態，結果就選上Mavis，她說：「我唔會要求佢識得跳火圈或者好叻做表演，但去到片場，冇諗過佢識得走位同跑樓梯，其實天台場戲係真天台拍攝，靚寶坐喺天台邊好似好危險咁，但其實我哋當然做足安全措施，綁好貓帶，由我老公匿埋附近，拉實條繩。」Mavis的乖巧和親和力，最終更成功俘擄一眾演員，特別是原本怕貓的陳山聰，她說：「原本第一日見面，佢同Mavis合照，都係我抱住，佢喺好前面自拍。道具組知道佢怕貓，做定隻道具黑貓，或者有時替身做危險少少嘅動作，隻黑貓做得好真，靚寶見到都即刻瞪大隻眼。」後來，日夕相處後，山聰都克服心理障礙，抱住真實的Mavis演戲，更拍了不少照片留念。
施嬅早就被靚寶融化。(圖片：李施嬅IG)
靚寶拍攝天台戲時，原來主人爸爸都好辛苦。(《晴報》圖片)
Mavis見到同自己一樣樣嘅道具貓，非常驚訝。(圖片：陳山聰微博)
陳山聰由怕貓到學識同靚寶共處，實在難得。(圖片：陳山聰微博)
最終山聰都不用抱道具貓，直接抱住靚寶演戲。(圖片：無綫《金宵大廈》劇照)
阿Me是愛貓愛狗之人，家中六隻貓和兩隻大狗都可以和平相處，她說：「兩隻大狗，一隻係阿拉斯加雪橇Meke，另一隻係洛威拿Chiko，起初要等佢哋慢慢適應，先將貓貓困入籠，等佢哋朝夕相對一個月時間，慢慢開始習慣有呢隻生物喺屋企，先畀佢哋一齊住。養得大狗就一定要做好訓練，我有帶狗狗去上堂，所以佢哋好乖。」
Chiko同靚寶都是領養回來的家庭成員，靚寶初初回到家不久就出癣，情況嚴重，阿Me率先將靚寶同狗狗隔開，可惜自己的手同肚子都受到感染，但從來沒有打算棄養，她說：「身體開始有爛又甩毛，由條尾開始發作，慢慢成家都甩毛，好擔心佢，但醫生話佢太細個唔適宜用藥，我又唔想畀類固醇佢用，於是買好多補品餵佢，鹿茸丸或者美毛嘅魚油丸都會買畀佢，希望增強佢嘅的免疫力，實在係付出好大心機。」
靚寶真係好可愛。(圖片：受訪者提供)
原來開頭因為生癣令主人阿Me都受到感染。（圖片：受訪者提供）
提到領養，阿Me最難忘是救Chiko回家的一幕，她直言養狗多年從來未見過狗狗喊，無論是Chiko上車一刻還是在家梳化趴著都會流淚，令她非常心痛，當時Chiko營養不良瘦骨嶙峋，阿Me花盡心機照顧，原本只是打算暫託，但後來都不捨得放手，繼續做Chiko的主人。她憶起時都不忘落淚：「網上見過好多，但真實見到佢瘦到啲骨都凸晒出嚟咁，真係好慘。我實在好難理解啲人棄養個心態係點，就算我依家懷孕，我都唔會打算棄養，養小動物係可以教育小朋友，培養佢哋責任感同愛心。所以無論係貓同狗定BB，其實都可以共融。」
相關新聞：【金宵大廈】靚寶可愛背後隱藏坎坷身世 飽受生癬折磨幸得主人不離不棄
領養洛威拿Chiko回來時，營養不良骨瘦如柴。(圖片：受訪者提供)
Mavis雖然做咗爸爸，不過成日被班仔女蝦，老婆都會打佢，絕對是愛生事家族，難怪佢會特別嗲，經常都要黐實主人。阿Me明年3月就是預產期，她直言好期待BB同八位哥哥姐姐見面，身為寵物奴的她稱起初未計劃生育之前，一心打算將來可以生小朋友來陪班貓貓狗狗玩，她說：「無論係做孩子的媽媽，定係寵物嘅主人，最重要係搵到個平衡點，棄養唔係惟一出路。」
面對快將一家11口，阿Me最感激是她的丈夫，她說：「我老公一向最支持我，無論金錢上、體力上定時間上，真係好多謝我老公。依家懷孕，好多照顧動物嘅功夫都交畀佢做，辛苦佢喇！」阿Me感激觀眾和網民的支持，經常留言大讚靚寶的演技，她認為最重要是可以透過靚寶今次的演出，有機會讓她分享更多領養和照顧動物的故事，希望大家支持領養代替購買，承諾絕不棄養，阿Me說：「希望靚寶有機會再同大家喺銀幕上再見！」
主人阿Me對靚寶照顧有加。(《晴報》圖片)
靚寶的太太同四位小朋友。(圖片：受訪者提供)
撰文：楊安莉