【聲明】港生活網站並無進行電話推廣活動

又驚又要玩鬼屋 關智斌自認犯賤

發佈時間: 2019/10/11

愛玩的關智斌(Kenny)昨日到觀塘出席《生化危機體驗館》活動,並即場試玩。他自認大膽,卻又怕突然跳出來嚇他的物體,笑指這些就是犯賤!同場還有最近被離職的林子博,雖然突然失業,但獲得很多朋友支持,令他感到窩心。

Kenny自言玩鬼屋經驗豐富,但或多或少都會心驚膽顫,他說︰「我鍾意投入氣氛,但當有嘢突然跳出嚟,我就好驚,真係又要驚又要玩,呢啲咪犯賤囉!」談到今次首度與何超蓮一齊為體驗館拍攝宣傳片,他大讚對方表現投入又好戲︰「佢真係好正,平時見佢都係做下時裝、扮到靚靚咁,點知拍攝時有劇情又要講對白,佢都完全應付得好好,又能做出誇張表情,簡直超乎想像。」

早前完成紅館演唱會,Kenny休息了一陣子,最近重新投入工作,他透露下月會前赴歐洲影靚相,問他是否影寫真?他帶笑默認,不過詳情仍未落實,還要賣關子,問他是否要操弗身形穿泳褲?Kenny表示︰「之前放假畀自己放肆咁食,依家要節食keep fit喇。」

另外,昨日是林子博離開無綫後首個司儀工作,他直言各界得知他太太患上罕見癌症後,都紛紛出手幫助,體會到人間有情,他說︰「真係多咗好多人搵我做嘢,呢個係諗唔到嘅,呢個圈好多人幫助我。噚日遇到業主立案法團主席,平時成日見佢鬧人,原來都有感性一面,佢畀咗張五位數字嘅支票我,佢睇住我一對小朋友長大,大家成日打招呼,佢好有心,同我講係小小心意。有時我行街經過啲舖頭,唔識嘅老闆都會叫我加油,仲話低潮一定會過。」

林子博過檔ViuTV拍劇

子博又表示,早前返內地拍戲的古天樂,返港後打電話給他,關心是否有劇組聯絡子博,原來ViuTV新劇《地產仔》導演搵他,還給兩個角色畀他揀,分別與鄭浩南及劉兆銘做對手戲,不過子博為了尊重導演,都會按他的分配去做。子博又謂現時的工作已排到農曆新年,每月約有三個活動工作,但是收入還未及之前,始終要應付太太的醫療開支,故他希望繼續有工作機會。

採訪︰Pauline

編輯:黃寶恩

美術:Simion

林子博現時接工作都會遷就陪太太覆診的時間。