自認「燈神」逢賭必輸 馮盈盈：買我對家就啱

馮盈盈與李天翔前晚在將軍澳電視城錄影遊戲節目《娛樂大家》，平日轉數甚快的盈盈原來玩遊戲極差，自認黑仔的她更幾乎逢賭必輸，連買樓投資也睇錯時機。

馮盈盈前晚接受訪問，她笑言每次玩遊戲都非常投入，可惜幾乎都慘敗收場。她笑說：「我去到邊輸到邊！我知道今次要玩『狼人殺』遊戲，事前都有同男朋友寶寶練習，但都係輸。」她自言是「誠實小寶寶」，不懂得講大話，所以經常被識穿。

盈盈又大呻自己黑仔：「我係明燈無賭運，過大海（去澳門）賭錢，最高紀錄玩老虎機輸咗3,000蚊。可能我係賭仔心態啦，成日覺得下一鋪會贏。」她指連投資也觸礁：「投資真係涉及風險，我都好謹慎，但係我上年12月摸頂入市（買樓），真係好黑，暫時因為印花稅關係，仲未知會蝕幾多。」會否嚇怕男友寶寶？她笑說：「我有提醒身邊朋友，如果我再投資，記得買我對家，到時贏咗最好分番啲畀我。」

李天翔返娘家宣傳

同場的李天翔早前已約滿離巢無綫，前晚特地回娘家錄影，宣傳台慶劇《解決師》。他笑言玩遊戲不夠叻：「大家唔好睇我扮得奸人多，以為我好醒好曳，其實我好蠢㗎。真實嘅我係好人，好多人都唔信。」回復自由身的他，希望兼顧電影、電視工作，問他會否返內地工作？他說：「之前都有人斟我返內地做嘢，不過合約傾唔成。我去邊度做嘢都無所謂，太太都好明白事理，就算要返內地做嘢，佢都會支持我。」

撰文︰Pauline

攝影︰林良明

編輯：李潔盈

美術：梁政敏