夏雨仔傷感爆平日扮Sweet Cheronna@Super Girls被撇否認一腳踏兩船

女子組合Super Girls成員Cheronna（吳嘉熙）同夏雨仔黃奕晨兩年前公開承認交往之後，成日都喺社交網放閃，二人仲開咗一個#黃奕晨與吳嘉熙的共同hashtag，甜到糖尿呀！不過雙方對上一次Post大合照已經分別係6月同4月，佢哋嘅共同hashtag對上一次更新更加已經係3月，睇嚟情變似乎早有伏線！

▲（Cheronna IG）

▲（Cheronna IG）

Cheronna當年被指係Dixon同未婚妻之間嘅「第三者」，後來大方認拍拖，仲視對方為結婚對象，一早見晒家長，今年新年期間Cheronna仲跟男友舉家返加拿大。夏雨當時都用「一家人」去旅行形容呢次加拿大之旅，似乎都認定Cheronna係新抱仔，不過問到二人幾時拉埋天窗，夏雨就話：「冇諗呢個問題，一切隨緣，佢哋嘅人生，佢哋決定，唔由得我去干預。」但今年年中Cheronna突然轉口風，話對將來嘅事會睇化啲，又指唔知道大家將來會唔會遇到更啱嘅的人。

▲Cheronna見過晒家長，夏雨都認定佢係一家人。（黃奕晨 IG）

Cheronna被指「秘撻」共同朋友商台DJ「阿檸」，索性微博澄清同黃奕晨已分手個幾月，劈腿傳聞亦係子虛烏有：「分手唔係我提出，話我一腳踏兩船唔係事實，同阿檸絕對冇發展可能。」

▲Cheronna同阿檸早前齊齊去英國參加共同好友嘅婚禮。（Cheronna IG）

而黃奕晨近日放獨照更寫下傷感留言：「當覺得人生去到低處，唔使唔開心，因為低處未算低。」不過佢日前接受訪問時就否認情已逝，話只係為小事鬧交，已經冇事，仲話少見係因為各有各忙。黃奕晨講到拍拖兩年，所有濃情都變感情，二人平日人前Sweet爆，佢就話係「對住出面人先Sweet」，聽到都覺得好欷歔！又再三表示和Cheronna沒有結婚計劃，雙方有共識工作為先，而他事業上亦有新路向。

▲（Cheronna IG）

不過在事情不斷發酵下，黃奕晨今日都喺社文網交代：「我同Cheronna嘅分開，原本係打算低調處理。所以我倆一直都不作任何回應。直到今日嘅報道，連累到身邊嘅朋友，萬分抱歉，所以需要為此事出來澄清。我倆分開，並沒有牽涉到第三者，而Cheronna亦沒有一腳踏兩船。希望大家可以明白每段感情完結都需要時間同空間處理情緒，我亦沒有其他回應了，謝謝大家關心。」

▲（Cheronna IG）

撰文：黃蘊姿