【聲明】港生活網站並無進行電話推廣活動

4場非一般紅館騷落幕 Juno終現身與Kay合唱《羅生門》

發佈時間: 2019/10/14

一連四晚《kay…isn't me. Live 2019》演唱會前晚圓滿結束,適逢是尾場兼周末,謝安琪(Kay)老公張繼聰特別攜同一對仔女張瞻及張靖捧場,不過囡囡太細個,看了一會便回家瞓覺。有份籌備今次演唱會的麥浚龍(Juno)終於壓軸登場,成為唯一的嘉賓。

謝安琪今次個唱充滿實驗性,成功掀起話題,頭三場皆沒有特別嘉賓,Juno在前晚尾場上台與Kay合唱《羅生門》成為彩蛋,但兩人依然沒有一句對白,零交談,隔着一條樓梯對唱。唱完後,Juno才上樓梯與Kay一起向觀眾鞠躬謝幕,歡呼聲震撼全場,成為全晚的高潮。Kay於最後一幕換上全新的歌衫,頭上戴着反轉了的草帽,寓意人生不要墨守成規,有時可以按自己心意做人,所以將帽子反轉戴。

Kay完騷後接受訪問,問她全晚「零說話」是否忍得好辛苦?她表示︰「我覺得唔需要用說話去溝通,大家跟隨我哋嘅表演就可以好好咁交流,呢個係我最初嘅概念,都為我帶嚟壓力,所以都唔易做。每次出場,好似有四堵牆喺中間,我會當成個場只得我一個。」

否認模仿王菲作風

由於Kay刻意沒跟觀眾說話,所以被指演出似是模仿王菲,她直言沒這樣的想法,「可能唔講嘢係共通點,但我哋只想忠於原著。其實最後都畀咗個surprise大家,所以Juno才會上台。」提到很多金曲都沒有唱,Kay解釋︰「作為歌手應該要逼自己創新,否則唔會有新經典,向前行需要勇氣,調整心態好重要。」

至於個唱上發放的紙碎亦很特別,印有不同的文字,她表示︰「平常演唱會放紙碎係為咗靚,我哋想係送個祝福,希望大家喺字裏行間,收到我哋嘅心意。」Kay又透露,舞台製作共花了約2,000萬港元,她更特別感謝古天樂抽空演出兩條短片。

撰文︰Pauline

編輯︰陳禮恒

美術︰梁政敏

Kay在尾場換新裝,她把草帽反轉戴,寓意人生不要墨守成規。

完成尾場,Juno與Kay感謝大家一起度過美好的四個晚上。