鍾沛枝於2001年參選香港小姐競選奪亞軍,同屆冠軍為楊思琦。對方其後被力捧;鍾沛枝則被安排到收費台做主持,令佢有被「投閒置散」嘅感覺。鍾沛枝可以話係生不逢時,因為同佢非常似樣嘅朱千雪遲佢11年選港姐奪季軍,後來喺娛樂圏嘅發展卻是一帆風順。
(鍾沛枝微博)
同朱千雪真係好似!(東星娛樂)
鍾沛枝18歲參選港姐係為圓媽咪心願,覺得發展不似預期而離開娛樂圈,之後原來有啲後悔。佢話自己當時年紀細,思想不成熟,覺得做收費台冇人睇到,有啲心灰意冷,但其實收入係唔錯:「主持爆騷每個月都有3、4萬收入,其實TVB對我好好,我提出離開,樂小姐當時都有挽留我,但當時係諗唔通。當時佢對我好好,好感激佢。」
(鍾沛枝微博)
後來佢去過做空姐,都有少少唔習慣:「以前做藝員,有人幫你打點服侍,就算出活動,都係尊貴嘅嘉賓,但突然之間,要轉去Serve番人。嗰時每隔一陣,就會見到有記者匿喺柱後偷影我,都明白嘅。雖然我做藝員嗰陣,唔算高調,但突然佢哋覺得係個Talking Point喎,覺得我好坎坷,得7,000蚊底薪,不過其實當時我唔止呢個人工,因為我好勤力OT,仲有員工福利嘅。」
(鍾沛枝微博)
(鍾沛枝微博)
喺航空界打滾咗4年,鍾沛枝雖受到公司賞識,但仍毅然離開接受新挑戰:「公司想升我職好幾次,不過我真係唔想,我選擇繼續做番地勤嘅位。因為去到Supervisor嘅位,就即係有一定責任,亦要面對客人。試過有好幾次,遇着啲有性格嘅客人,會有啲特別要求。雖然我EQ唔低,但有時遇到啲突發情況,例如隻機起唔到飛,要面對一啲比較焦急嘅客人,你要變得好有耐性同佢哋解釋,但有時都會覺得唔開心,始終都係想開開心心打工,本身又鍾意扮靚,所以就決定轉行做美容。」
(鍾沛枝微博)
後來鍾沛枝喺美容中心做員工形象指導顧問。出身小康之家嘅鍾沛枝,靠爸爸開燒臘檔養起全家,鍾沛枝間中會到檔口幫手做收銀同抹枱:「依家屋企有2間燒臘舖,可以話係爸爸嘅心血。係斬叉燒養大我哋,爸爸好辛苦湊大我同細佬,始終係傳落嚟嘅手藝。」
鍾沛枝父母。(鍾沛枝微博)
據知鍾沛枝後來再轉到去一間美容公司做客戶服務嘅Trainer,但有傳佢依家已經離咗職做少奶奶。鍾沛枝多次勇敢跳出Comfort Zone迎接新事物,真係唔係人人都做得到呀!
(鍾沛枝微博)
撰文:黃蘊姿