教大學生赴冰島交流 開拓眼界 訪尋快樂

一個人要開心，究竟係容易定唔容易呢？黛安聽公關姊妹講，香港教育大學20名學生喺今年4月中，去到冰島首都雷克雅未克，參與為期兩周嘅「尋找快樂之旅」交流活動，尋找快樂嘅奧秘。

冰島雖然曾陷入破產危機，但今年喺「世界最幸福國家」中仍然排第4名！有份參與今次交流活動嘅三年級學生老智航（Andrew），本身天生患有成骨不全症（俗稱玻璃骨），平時出入都要用輪椅輔助；Andrew話自己曾經係乒乓球殘奧港隊代表，因多次離港出外比賽，令佢覺得「世界很大，人類很渺小」，所以認為要活得快樂其實好簡單，傷殘人士都有追求快樂嘅權利。

Andrew嘅志願係做老師，佢話今次交流參觀咗一所特殊學校，有老師向學生講︰「It's okay to make wrong」。Andrew認為呢個想法同香港嘅教育好唔同，更下定決心如果將來做老師，要接納學生犯錯。

同樣有份參與交流活動嘅四年級學生李靄靈（Nicole）就話，香港人較重視金錢同社會地位，冰島人則比較重視人與人之間嘅關係。Andrew亦話，見到冰島即使經濟環境差，國民仍然好樂觀咁生活，原因係佢哋更在意健康與自由，唔係只着眼喺物質。

黛安知道，今次活動係由教大學生事務處首次舉辦，目的係透過正向心理學理念到海外交流，建立學生正面嘅人生態度，黛安都覺得活動好有意思，一定要畀個讚！