非物質文化遺產市集 感受傳統藝術

每個地方都有佢獨特嘅文化。黛安知道，「香港文化節」嘅其中一個節目、為期3日嘅「非物質文化遺產市集」，今個星期五至日（25至27日）就會喺香港文化中心露天廣場舉行。到時會有「香港龍獅文化滙演」，當中「獅劇表演」將舞獅集合功夫、風水等元素，等大家耳目一新。

主辦機構今年仲邀請咗2位韓國得獎嘅佛教僧侶志亨同燈明來港，到時會演出由駐香港韓國文化院主辦嘅「韓國佛教僧侶法鼓表演」，等大家感受下韓國佛教精髓。

此外，仲有以中國傳統南音帶來悅耳悠揚嘅音樂表演「地水南音樂韻會知音」、「掌中木偶及提綫木偶表演」等。而今年全新加入嘅「嶺南生草藥之涼茶與跌打」攤位，更會有健康諮詢、中國草藥同跌打，到時大家可以了解埋中醫藥文化。