【聲明】港生活網站並無進行電話推廣活動

孖周秀娜合作 吳業坤望加親熱戲

發佈時間: 2019/10/21

吳業坤與吳若希(Jinny)昨日到荃灣出席慈善步行活動,坤哥將與周秀娜合作拍新戲,坤哥自爆一直視娜姐為女神,更開口講明希望導演為他們加親熱戲。

吳業坤昨日自爆座駕差點遇上飛來橫禍,事緣他將車泊在街上咪錶位,之後突然收到警方電話,原來有塊大鐵板從天而降,跌在他的座駕與前車之間。他說︰「好彩車同人都無受損、無受傷,我本來諗住泊天橋底會好安全,點知天橋跌嘢落嚟。」他自言座駕絲毫無損相當好彩,更想好運可以延續。

另外,坤哥將飛往馬來西亞拍新戲《非凡三俠》,預計逗留一星期︰「今次算係一半做嘢一半度假,會帶埋媽咪去。」提到今次與周秀娜演對手戲,坤哥笑說︰「估唔到我哋當年一本寫真集結緣,依家有機會合作。」他透露二人有感情戲︰「睇劇本暫時未有親熱戲,希望導演到時現場有安排。」

吳若希睇囡囡相爆喊

同場的吳若希獲老公Alex陪同到場,她表示原定下月出埠拍旅遊節目,但因當地局勢而取消,令她可以在家中湊女。她說︰「前排走咗十日拍《森美旅行團3》,去到第五日已經好掛住個女,喺酒店睇住佢啲相喊。雖然有同囡囡FaceTime,但係都好掛住佢。」

撰文︰Pauline

編輯︰李潔盈

美術︰梁政敏

周秀娜(資料圖片)