周五旺角照開騷 阮兆祥擔心交通： 見步行步

阮兆祥（祥仔）將於本周五起，於旺角麥花臣場館舉行一連三場《阮兆祥King of Dreams演唱會》。近日周末持續有示威活動，祥仔表示目前會如期開騷，他指場館位置即使沒港鐵，但有其他公共交通可達，故希望順利舉行。

阮兆祥昨日與羅凱鈴（Judas）在九龍灣綵排個唱，祥仔用上王祖藍送贈的金咪練歌。他說：「好多朋友支持，佢哋除咗買飛買碟，仲捐錢去福幼基金，到時現場有善款箱，觀眾睇騷之餘又可以做善事。」他表示要養聲，笑言開騷前要「封嘴」：「朋友好有心，又送人參又送滴雞精。不過老闆祖藍送咗支金咪畀我，我叫支咪做『藍藍』。」

提到因各區示威活動，令同期開騷的陳綺貞、蔡一傑取消個唱，問祥仔可會擔心？他坦言一定會擔心觀眾的交通及安全問題：「場館位置相對比較好少少，附近交通都好方便，就算坐唔到港鐵，都仲有巴士同小巴。無論如何祈禱保平安，我哋有plan B，但唔想用到，如果改時間、改期，可能好多朋友睇唔到，惟有見步行步。」他表示自己仍未知道到時的舞台設計如何，所以十分期待。

羅凱鈴趁機踏台板

至於獲祥仔邀請擔任表演嘉賓的Judas，笑言心情開始緊張，原來她下月14日將在同一場地開音樂會：「我可以藉今次機會踩下台板，踩熟個台，對自己調整心態有幫助。其實今次做嘉賓仲緊張過自己開騷，因為驚自己有咩差錯，會影響祥師兄。」

採訪、攝影︰Pauline

編輯：李潔盈

美術：梁政敏