潮飲中國精品茶 品嘗慢活時光

嫩粉紅襯淡金銀，小清新的優雅包裝，不說以為在歎英式breakfast tea；定神一看，卻原來是中國茶。兩年前才由May成立的「茶老七」，就旨在讓喝中國茶年輕化、簡單化，讓忙碌的新一代，也能在拼搏過後呷一口茶，喘一喘息，停下來享受慢活。

老闆羅筱微（May）曾在日本大型化粧及護膚品公司工作21年，2016年離職時，是香港區的總經理。「嗰時做嘢壓力真係好大，就想去搵啲嘢學放鬆下，連泰拳都學過。」嘗試過不同事物後，最後她選擇了品茶，「以前做日本公司，日本人好鍾意飲茶，因工作需要自己都成日飲，慢慢就有興趣。但我就諗，既然日本茶都係中國傳入，要學點解唔學最Orignial嘅呢？」她決定拜有「鳳凰單叢第一人」美譽的潮州茶藝師黃柏梓學藝，自此中國茶道成為了她的愛好。

「以前星期一至五就狂做，一到星期六、日就約朋友喪玩，以為咁樣就係放鬆。唔止我，好多香港人都係咁。」May以自身的經歷，希望大家可以透過品茶做到Work life balance。「學咗茶之後覺得，其實Relax可以好簡單。放工返屋企，靜落嚟沖杯茶，慢慢品嘗，成個過程係一個Enjoyment。唔使一定要假期先可以放鬆，平日隨時都可以。」

鳳凰山自家茶園

名字「茶老七」中其實已包含了May的意念，「古人話開門七件事『柴、米、油、鹽、醬、醋、茶』，到『文雅版』嘅『琴、棋、書、畫、花、酒、茶』，無論係『養生』定『養心』，『茶』都係排第七。茶可以令我哋心靈上滿足，畀到我哋家嘅感覺。」

不要以為他們的出品徒有其表，他們在單叢茶的名產地潮州鳳凰山擁有自家茶山，品質自有保證。單叢10大花蜜香型之一的蜜蘭香、老叢拓富等都是自家茶山出產，其他雲南產的昔歸普洱、七子普洱、金邊玫瑰，及廬山的雲霧綠茶等，都是直接向當地茶農購入，由May親自視察過。「咁樣可以確保茶嘅品質，知道飲緊啲咩落肚。我哋嘅茶葉重金屬同農藥殘留都唔會超標，亦都符合公平貿易原則。」店內現已有12款茶，超過30款產品。

擔心初接觸茶的年輕人無從入手，May特別在包裝上照顧新茶客。「後面有晒產地、功效、沖法，新手都唔怕唔識。」下次想Relax，與其約朋友喪玩，不如試着靜心下來沖杯茶，感受慢活。

茶老七

電話︰9662 2816

網址︰www.slower-pace.com

銷售點︰崇光百貨、慢活館網站、HKTVmall、The Club

撰文︰王寶欣

編輯︰余運慶

美術︰梁政敏

攝影︰林良明