充撑場面的台灣美食

樂天如我也受到最近香港紛擾時局一定的影響。

每天起來身頭就扯住痛，呼吸唔順，好多時都要唞大氣，手背、手㬹都出現紅疹，我知道我已經中招了。不過，不是抑鬱或者焦慮症，而是躁狂，所以我盡量每星期都離開香港。至少有言論自由，不似在香港，講了甚麼有人不鍾意聽的便會惹禍上身。

話說我前個禮拜約了幾位政見一樣的朋友飲下午茶，期間友人話服務員好似聽到我們談論的話題，而一直怒睥我們。唔係嘛？我已經好自律咁用細細聲嚟講，咁都唔得？係咪我哋多心呢？

結果我同朋友叫了一件栗子蛋糕share食，服務員用唔多客氣嘅表情放低件蛋糕，我同朋友大家互望，再睇住件蛋糕，唔敢食。後來我靈機一觸，用刀將蛋糕表面我最鍾意嘅忌廉撥走晒，我同朋友就用叉撩中間嘅粟子嚟食，真無奈。口沒遮攔的我，雖然非常想撑餐飲業，但為了安全起計，還是盡量約朋友返屋企聚會好些。

上星期我專程去台灣，買定一些儲備食物隨時招呼朋友。我鍾意去佢哋嘅南門市場入貨。例如蜜汁火腿，用封密的包裝可存放一年，只要蒸15分鐘，夾埋喺香港超市可買到的小饅頭一齊食，非常美味，完全可以充撑場面！

四神湯包亦是我必買煮食之寶。飲用時，只要買些煲湯排骨，同湯包內嘅材料煲一個鐘左右已經好出味，客人每次飲後都會添多一碗，兼問係乜嘢嚟。這是台灣非常溫和的中藥藥膳湯，內裏有蓮子、山藥、茯苓、芡實、薏仁。四神湯有健脾開胃、調肝固腎、祛濕清熱、補中益氣的功效。所以好味之餘，仲可補身，係咪不能不買呢？

（本欄逢周四刊登）