蕭正楠籌備生日之旅 黃翠如爆老公唔識用App

黃翠如、蘇志威及甄澤權等昨日到中環出席婚姻網站活動，日前剛度過38歲生日的翠如，除吃了很多餐生日飯外，又獲老公蕭正楠安排旅行慶祝。不過翠如搞笑大爆老公原來是「科技白癡」，完全不懂得使用手機程式安排行程。

黃翠如昨日穿上露肩裙出席活動，她自爆最近吃了很多餐生日飯，所以胖了不少。她笑說︰「我不停咁打邊爐，每次飯局都有C君，其實喺我未生日，佢已經買埋蛋糕上我屋企同我慶祝。」翠如透露老公蕭正楠正計劃跟她去旅行補祝生日，相當有心︰「平時去旅行都係我負責行程，但呢排我要開劇，所以今次由佢負責資料搜集。但係原來佢咩app都唔識用，我喺屋企教佢下載租酒店、機票app，佢連call的士嘅app都唔識用。」

另外，提到唐詩詠與舊愛洪永城雙雙出席翠如的生日會，翠如解釋他們仍是好友，對於網民召喚他們復合，翠如即說︰「唔會啦！佢哋兩個係好好嘅朋友，洪永城嘅女朋友（梁諾妍）都好sweet，佢嗰日雖然要開工嚟唔到，但係都有send短訊畀我。」她指唐詩詠與洪永城保持互窒的好友關係。

蘇志威同老婆日日談心

同場的蘇志威說，日前與太太劉小慧慶祝結婚21周年紀念︰「當日我哋睇緊戲，有朋友send 21年前TVB一條片，我先記得（結婚周年）。其實97年嘅boxing day先係我哋嘅結婚周年，但因為第二年10月20號有咗囡囡，所以喺嗰日擺酒，成為我哋第二個結婚記念日。」至於夫妻相處之道，他表示在於溝通︰「我哋每日都傾個幾鐘頭偈，有啲朋友同我講話同老婆無偈傾，咁先係重大危機。」

撰文︰Pauline

編輯︰李潔盈

美術︰梁政敏