選得香港小姐梗係美貌與智慧並重，之不過唔化妝示人又會係點呢？呂慧儀自同黃文廸離婚後獨力照顧囝囝「蟹籽」，日前佢突然曬零妝相，借囝囝合照表達心聲：「真正愛我錫我的人，永遠不會傷害我的人。真正的愛可以減輕傷痛，懂事的老闆永遠愛我。」搞到網民好擔心問佢係咪有咩觸動情緒，好彩呂慧儀話冇事。此外仲有唔少網民大讚身為2006年香港小姐季軍嘅佢Keep得好：「皮膚好好」、「咁清純嘅」、「少女嘅眼神」等，「豹嫂」胡蓓蔚都話真心覺得佢唔需要再化妝咁話。
另外，1991年港姐季軍蔡少芬適逢萬聖節將至，特意放出素顏相，只見相裡面嘅佢矇眼、孖潤腸、大粒癦，仲表示：「美有好多種類！」再配上嘔吐表情，網民紛紛留言：「媽呀，嚇我一跳」、「差點把手機扔了」。其實佢只係用咗變臉App自拍變醜，佢身為中越混血兒素顏當然好靚。
除咗佢哋2個，跟住落嚟繼續睇埋70年代至今15位佳麗嘅素顏真面目：
1979年冠軍─朱玲玲
想當年佢一出嚟就艷壓群芳、震撼全城，到依家61歲素顏仲好靚！
1983年亞軍─張曼玉
張曼玉今年先被途人喺街市野生捕獲，雖然舊年濃妝曾被指走樣，不過如今五官同皮膚仍然好靚。
1984年冠軍─ 高麗虹
高麗虹係中澳混血，雙眼皮好深，似足外國人，素顏同以前化妝零分別！
1988年冠軍─ 李嘉欣
身為大美人名不虛傳，雖然紋咗眉，不過皮膚緊緻，靚樣依然。
1989年冠軍─陳法蓉
陳法蓉平時都係化淡妝再戴眼鏡，不過同完全唔化都冇咩分別。
1990年冠軍─ 袁詠儀
靚靚就真係靚靚，以前到依家多數以素顏示人，冇驚過。
1991年冠軍─ 郭藹明
好彩有人野生捕捉到郭藹明，如果唔係都唔知佢素顏咁多年都冇變過。
1992冠軍─盧淑儀
盧淑儀認真誇張，素顏勁後生，唔怪得令李克勤死心塌地愛佢。
1994年冠軍─譚小環
譚小環一開始已被外界視為3甲人選嘅大熱門之一，最終佢都不負眾望，素顏當然好睇。
1997年季軍─ 佘詩曼
阿佘做得護膚品代言人，仲同後生女蔣家旻比較，唔化妝當然都咁煞食。
1999年冠軍─ 郭羨妮
郭羨妮冇化妝啲皮膚仲係勁好！
2012年季軍─朱千雪
朱千雪係民選冠軍，素顏都好靚。
2013年冠軍─陳凱琳
陳凱琳唔化妝只係黑眼圈重少少，不過隻眼依然好有神。
2015年冠軍─麥明詩
麥明詩唔化妝應該大家都睇過，就係佢返學校拎10A成績表張學生相喇！
2016年冠軍─馮盈盈
馮盈盈唔化妝眉毛比較淡色，只要畫返就唔使再上其他妝。
(TVB電視截圖/各大藝人微博)
撰文：張芷晴