「我唔係青雞面！」喺《鐵馬尋橋》入面飾演終極大奸角、七省拳王「榮德」嘅林嘉華，奸之餘亦係一個悲劇人物。林嘉華將演技發揮到淋漓盡致，當年睇到觀眾咬牙切齒又帶點同情。
（《鐵馬尋橋》截圖）
唔知係咪局限咗喺佢兇神惡煞嘅外形，林嘉華經常都係演一啲奸到出汁嘅角色，但其實現實嘅佢喺入行前，做過5年正氣凜然嘅皇家香港警察。
（林嘉華Facebook）
林嘉華嘅父親當差，佢自己15歲時亦就讀少年警校，再入讀黃竹坑警察訓練學校，做過《少年警訊》主持，再轉行做演員。1974年佢仲做緊警察嘅時候，已經第一次喺港台劇《獅子山下》演過差人。林嘉華亦經常演警察，有時係黑警；有時係忠忠直直嘅白警。數數手指，從影以嚟林嘉華已演過共17次差人，「御用警察」形象入骨。
（網上圖片）
現實中嘅佢除咗正氣之外，仲係一個「寵妻狂魔」，同老婆結婚近35年一直都零緋聞，提起老婆同阿仔嘅時候，鐵漢喺字裡行間仲充滿柔情。林嘉華同老婆劉寶珍經常一齊周遊列國，兩公婆秤不離砣。
（劉寶珍IG）
林嘉華Sweet爆透露同太太愛情保鮮嘅心得：「結婚幾多年都好，我一直將佢當作女朋友嚟看待。兩夫婦相處唔好忍讓，要磨合，任何缺點、生活習慣都要磨合。」
經常同太太一齊出席活動。（東星娛樂）
圈中模範夫妻。（東星娛樂）
劉寶珍同林嘉華每次見人都襯到絕兼非常Fashionable，原來劉寶珍都非常猛料，以前係無綫嘅港姐形象顧問，依家就變咗林嘉華嘅私人形象設計。
使唔使咁型呀？（東星娛樂）
80年代林嘉華為咗畀阿仔林政峰有更佳嘅成長同教育環境，暫停咗香港嘅事業發展，舉家移民加拿大。
（劉寶珍IG）
林嘉華阿仔遺傳咗佢嘅創作頭腦加媽媽嘅設計細胞，現年28歲嘅佢喺加拿大經營時裝網購平台，負責攝影、寫文字介紹產品，又開咗用礦物植物天然染料印T恤嘅環保衣服公司，且已經喺多倫多置業，幾百萬港元就有一個大廈單位連車位同儲物室，事業有成又完全唔使佢兩公婆擔心，佢哋先可以咁逍遙自在享受人生。
（劉寶珍IG）
（劉寶珍IG）
撰文：黃蘊姿