黛安
黛安

尖東海濱長廊亮燈 繽紛燈飾迎聖誕

發佈時間: 2019/11/06

尖東海濱長廊亮燈 繽紛燈飾迎聖誕

踏入11月,距離普天同慶嘅聖誕節又近咗一大步,歡度佳節當然唔少得去睇下聖誕燈飾!公關姊妹同黛安講,一年一度嘅「閃爍尖東耀香江」已開始,區內同海濱長廊一帶多棟大廈由噚晚起已正式亮燈,其中尖沙咀中心同帝國中心兩個多媒體幕牆嘅變色LED圓點燈,仲會增加至8.2萬顆,總面積超過4,000平方米,保證大家會耳目一新!

原來今年「閃爍尖東耀香江」已嚟到第37年,所以會為大家送上更多驚喜,除咗透過更大嘅多媒體幕牆,呈現更豐富視覺效果嘅數碼動態影像外,全區唔少地方燈飾亦各有特色,好似麼地道沿路嘅3條天橋,會有以熱氣球為主題嘅燈飾,再利用雪花燈飾加以點綴;麼地里就繼續有大家鍾意嘅燈海,並以星球同外太空等元素為題,帶來藝術又科幻嘅效果;永安廣場更會將坐喺半月上嘅老鼠圖案融入聖誕景象,迎接鼠年來臨;非常適合一家大細去打卡。

參加燈飾攝影比賽 贏豐富獎品

東尖沙咀地產發展商聯會主席邱文華同黛安分享,37年來尖東嘅燈飾,一直見證住香港發展,亦為大家添上唔少聖誕氣氛,希望透過光芒照亮維港,同埋照亮大家嘅心。

黛安仲知道,今年尖東閃爍燈飾攝影比賽,將以「共融、關愛」為題,比賽主題名為「燈映情、光聚愛」,只要喺個人Facebook或Instagram帳戶上載尖東燈飾照片,並hashtag #tstephotocontest37th,#OurLightWeCare及@tsteast,即可參加比賽,獎品仲相當豐富,一於齊齊紀錄咁靚嘅尖東喇!

撰文: 黛安 消息特靈八卦公關
欄名: 八卦名利場