方力申 (Alex) 連月來小方努力練水，曾經歷眼發炎、游到嘔，仲搞到不適送院，尋日終正式完成「點滴是生命」香港環島游45公里慈善挑戰，目標是籌款450萬，希望為45萬缺水貧困人口提供潔淨食水。
（IG圖片）
為咗籌多啲錢幫助有需要嘅人，其實除咗Alex之外，唔少藝人都善用自己嘅名氣，為慈善籌款不遺餘力，好多時為咗吸引善長眼球，仲會搵命博。
1991年中國華東地區發生嚴重水災，係內地第一次喺大規模自然災害後直接呼籲國際社會援助。當年港英政府撥款5,000萬港元賑災。香港演藝界人士亦於跑馬地馬場舉行「演藝界總動員忘我大匯演」，為災民籌集善款。
（網上圖片）
當中以劉德華表演心口碎大石碎到嘔血就最為人所知。片段中見到曾志偉同肥姐（沈殿霞）不停呼籲觀眾唔好亂學，因為華仔係經過長時間嘅專業訓練。之後就由4個彪形大漢合力將大石搬上去華仔身上，足見大石係真材實料。
（《演藝界總動員忘我大匯演》短片截圖）
（《演藝界總動員忘我大匯演》短片截圖）
之後師傅用大鐵槌出力咁喺華仔身上面打，足足打咗４下塊石先至碎開，呢個時候眾人都勁緊張扶起華仔，點知華仔就喺呢個時候突然吐血，驚到佢啲Fans We嘩鬼叫。不過好彩原來只係華仔同大家開個玩笑，佢一早含定血漿，華仔話寓意同中國受災嘅同胞血濃於水咁話。
（《演藝界總動員忘我大匯演》短片截圖）
（《演藝界總動員忘我大匯演》短片截圖）
據有關方面統計，到1991年7月23日，短短十天，香港嘅賑災籌款總額已達到4.7億幾港元。
（短片截圖）
1985年，周潤發（發哥）喺《歡樂滿東華》中擔水踩燈膽籌款，相信唔少人都好有印象。當時佢擔住兩桶水，慢慢踩上燈膽，真係一步一驚心，睇到現場人士及觀眾一額汗，真係藝高人膽大呀！
（短片截圖）
張栢芝2002年為《慈善星輝仁濟夜》錄影表演「炮彈戰車衝天飛」時受傷，事發時她駕駛已加裝防滾架跑車沿木搭跑道飛越五架並排私家車後跌墮地面，栢芝完成項目後猛喊腰痛不能動彈，現場醫護人員為佢套上頸箍送院。
（東星娛樂）
栢芝受傷後着急地追問醫護人員傷咗腰會唔會影響生育，幸好最後並冇大礙。TVB有鑑於排練與演出項目有風險而為現場約一百名人士（包括表演者、工作人員、記者等）購買二億元巨額意外保險。
（東星娛樂）
鄭希怡（Yumiko）2006年表演「空中飛人」環節都好大膽，雖然冇發生受傷意外，不過就慘被拍檔錢嘉樂扯甩褲，露出內褲。因為籌款節目一直都係現場直播，所以令一眾司儀、攝影師及觀眾呆在當場。事後Yumiko喺後台忍唔住放聲痛哭，心理陰影面積一定好大！
（短片截圖）
梁朝偉1993年表演一邊唱佢飲歌《你是如此難以忘記》一邊「吹喇叭」，仲有修哥同霑爺傍住，非常經典呀！偉仔雖然淨係飲到大嗌好飽，不過冇飲開咁飲法都咪話唔危險
（短片截圖）
1992年電視劇《大時代》正係熱播中，王菲就一邊唱佢主唱嘅播曲《容易受傷的女人》，一邊將雙手插入有過千隻蜜蜂嘅蜂箱入面「任躝」。（短片截圖）
仲即席改埋歌詞，認真大膽！（短片截圖）
依然係Keep住佢天籟之音嘅水準，好似播出嚟咁呀！（短片截圖）
撰文: 黃蘊姿