現年62歲嘅呂良偉，每次都係以最佳狀態示人，喺佢身上幾乎見唔到歲月嘅痕跡。型佬呂良偉直言以前都會夜蒲，但自從為電影《跛豪》增磅演出後，明白運動、飲食與睡眠質素，對身體健康有幾大影響，30年來從未間斷做運動，係靠天然方法留住青春嘅最佳例子。
（《跛豪》截圖）
出道遇恩人
呂良偉憑《上海灘》「丁力」一角爆紅，80年代進軍影壇，正值香港電影黃金時期，唔愁無戲拍，演藝生涯一帆風順。但原來開始時佢亦曾遭無綫嫌棄「唔夠靚仔」，差點未能入行。幸遇到貴人李家鼎（鼎爺），當時鼎爺係武術班訓練導師，鼎爺最滿意佢嘅認真態度，拍心口話幫佢搞掂。呂良偉對鼎爺嘅恩一世都記住，仲話冇鼎爺就冇今日嘅呂良偉。除咗鼎爺，呂良偉一生都遇到好多貴人，之後喺電視同電影圈嘅發展都好順利，不過感情生活，就波折重重。
（《上海灘》截圖）
被索高昂贍養費
呂良偉結過3次婚，對於與第一任妻子周海媚首段婚姻的終結，呂良偉在自傳中形容為「那時我們還不懂愛情」。
周海媚（東星娛樂）
不過，對於1996年與鄺美雲的一年閃電夫妻情，佢就形容係婚姻失敗，並唔僅僅係一段關係嘅完結，更令佢對愛情同婚姻原有信念徹底瓦解。
「我們拍拖不久便開始為小事情吵架，美雲是個外柔內剛的人，特別有主見；而我依然沒有從上一段失敗的婚姻中汲取教訓，只要開始吵架，一步也不會退讓。儘管頻頻吵架，我們依然是有感情的。」
時間愈耐，二人感情愈淡，甚至開始冇夫妻間嘅親密關係。「很多時候，我們待在一起完全沒有夫妻間該有的親暱，面對對方居然只能小心翼翼地說一些不痛不癢的閒話，就連朋友之間的信任感也消失。」8個月後，佢哋決定離婚。
（網上圖片）
1997年佢哋離婚時適逢金融風暴，當時呂良偉身家大暴跌，幾乎血本無歸。佢喺自傳中提到：
「我和鄺美雲的婚姻也在金融風暴來臨之後走到盡頭，儘管雙方沒有登記，但是我不想虧待鄺美雲一分一毫，在她的要求下，我答覆支付給她一筆高昂的贍養費。」
不過2001年呂良偉再闖情關，於法國迎娶現任妻子楊小娟。楊小娟嘅持家有道可以話為呂良偉帶嚟另一個人生轉捩點。近年呂良偉無論做生意家買「磚頭」，眼光都很獨到無失手。佢將一切歸功幸運兼有個賢內助幫手：「我眼光唔及太太，佢投資有道，我自愧不如。基本上我將所有錢交由太太投資，我只係攞少少錢夠平時生活費。」佢仲笑指自己係「無產階級」。
（楊小娟IG）
雖然依家好富裕，但佢教導阿仔有一套：「我同阿仔講『我嘅錢唔屬於你，技能同知識先係你嘅財富，自己搵到錢先真正屬於你，可以自我主宰點用，用我嘅錢要睇我面色，你自己揸主意啦』。」
（楊小娟IG）
（楊小娟IG）
撰文：黃蘊姿