黛安
黛安

創新基因研究奪金 勝知名學府 港生揚威海外工程競賽

發佈時間: 2019/11/11

創新基因研究奪金 勝知名學府 港生揚威海外工程競賽

香港中學生嘅生物科學知識水平真係好高。黛安知道,早前喺美國波士頓舉辦嘅國際遺傳工程機器設計競賽(iGEM)圓滿結束,而今年香港由仁愛堂田家炳中學、滙基書院(東九龍)、五旬節中學、保良局何蔭棠中學及德蘭中學組成Hong Kong JSS聯校隊伍參賽,仲奪得金獎,係首次有香港中學隊伍喺iGEM賽事中奪金,香港中學生嘅能力同科學水平絕對不能睇小。

黛安知道,iGEM重視以合成生物學方法解決本地問題,參賽隊伍要用1至2年進行科研工作,用基因工程方法解決一個當地社會問題,真係聽落都覺得好難。而每年有來自40多個國家、逾300支隊伍參賽,比賽分為研究院、本科生同高中三個組別。

參賽隊伍主要來自大學隊伍,包括哈佛大學、麻省理工學院(MIT)、牛津大學及史丹福大學等世界一流學府,而高中組別都有好多世界知名中學參加。聽講好似Gingko Biowork、Benchling、Opentrons等國際著名生物科技企業,都係當年iGEM嘅參賽隊伍,仲以參賽項目起家㗎。

而無論咩組別,每個研究項目都有最少6名具博士學歷嘅科學家作評審,評審範圍包括研究詳細報告網頁、20分鐘台上演講、海報展覽同多個答問環節。最後評審小組會就項目嘅質素,同隊伍表現作出評級,要達到一定標準先可以拎到金銀銅嘅獎項,而金獎係三級中最高級別,證明研究項目已達到世界級水平。今次香港中學生成功為港爭光,真係值得鼓舞呀。

撰文: 黛安 消息特靈八卦公關
欄名: 八卦名利場