為賈思樂獻聲 戚美珍獲三哥封「天涯歌女」

賈思樂（Louie）前晚在文化中心舉行《賈思樂Me & My Girls演唱會2019 Part 2》頭場，在圈中廣結人緣的他，除邀得戚美珍（三嫂）及毛舜筠做嘉賓，好友陳法蓉（Monica）與李司棋亦上台助陣，場面熱鬧。不過主辦單位昨日宣布，目前社會氣氛環境不能預測的因素及交通情況，決定取消昨晚的尾場演出，Louie亦有拍片致歉。

賈思樂前晚與戚美珍在台上邊唱邊跳《Venus》，三嫂又獨唱日文歌《To Love Somebody》及《雨絲情愁》，令觀眾十分驚喜，苗僑偉（三哥）更坐足全場支持三嫂。三嫂演出後在後台受訪，謙稱只是硬住頭皮去唱歌，但獲三哥大讚︰「表演好好，我喺台下有嗌encore，唔係你點可以唱足幾首呀！」

三嫂自爆天天在家霸住廁所練歌，又笑說︰「我唱歌夠氣係做咗阿媽練番嚟，生兩個更加夠氣。」在旁的三哥提議太太做歌星，三嫂坦言想了幾十年，可惜一直無人邀請她。三哥更突然大爆三嫂花名叫「天涯歌女」︰「三嫂一唱K就咪不離手，乜歌都唱，英文、日文、廣東話、國語，但唱極都係舊歌，因為個人舊。每次朋友聚會有冷場，就會叫佢上台唱歌搞下氣氛。」

陳法蓉否認同張晉不和

至於陳法蓉及李司棋則在台上大爆與Louie的趣事，陳法蓉自言與Louie相識超過20年，經常相約去旅行︰「Louie叫我上台破壞佢形象，佢好多烏龍嘢，去旅行成日去錯集合地點。」另外，提到好姊妹蔡少芬（Ada）正陀第三胎，陳法蓉主動澄清跟蔡少芬老公張晉無不和︰「我哋關係好好，我見證張晉追Ada、求婚同結婚每次都在場，佢兩個女出世都有喺醫院，今次Ada生第三胎，都會留時間喺香港陪佢。」她透露已知Ada胎兒性別，但會保持神秘。而李司棋笑言爆料有難度︰「Louie好乖，個人又有禮貌，係陽光大男孩，唯一缺點係太靚仔！」

撰文︰Pauline

編輯︰李潔盈

美術︰顏玉玲

攝影︰林良明